Hayajon, cheksiz quvonch, alamli ko‘z yoshlari. 60 ming o‘quvchi ishtirok etgan “Zakovat” turniri yakuniga yetdi

Prezident Shavkat Mirziyoyevning 2022 yil 20 yanvardagi “Zakovat” intellektual o‘yinini aholi o‘rtasida ommaviy-ma’rifiy harakatga aylantirish va boshqa intellektual o‘yinlarni rivojlantirishga oid chora-tadbirlar to‘g‘risida”gi PQ-96-sonli qarorida Xalq ta’limi vazirligi, Yoshlar ishlari agentligi va “Zakovat intellektual klubi” nodavlat notijorat tashkilotiga o‘zaro hamkorlikda Umumiy o‘rta ta’lim maktablari o‘quvchilari o‘rtasida “Zakovat” intellektual o‘yinini o‘tkazish vazifasi yuklangan edi.

Ushbu qaror ijrosi doirasida mas’ul tashkilotlar ulkan masshtabli turnirni a’lo darajada o‘tkazdi. Musobaqa uch bosqichda (tuman, viloyat va respublika) bo‘lib o‘tdi.

Joriy yilning 13 sentabridan boshlangan musobaqa dastlab tuman (shahar)lar darajasida bo‘lib o‘tdi. Musobaqaning tuman bosqichi bir hafta davom etib, ushbu bosqich respublikamizdagi 8682 ta maktabni qamrab oldi va unda maktablarning 60774 nafar o‘quvchisi ishtirok etdi. Har bir tuman (shahar)dan kuchli uchlikni egallagan jamoalar turnirning viloyat bosqichiga yo‘l olishdi.

Shu yilning 28 sentabr kuni musobaqaning viloyat bosqichi bo‘lib o‘tdi. Ushbu bosqich respublikamizdagi 14 ta hududdan jami 624 ta jamoani qamrab oldi. Ushbu jamoalarda jami 4368 nafar o‘quvchilar viloyat bosqichida qatnashdi. Viloyat bosqichi o‘yinlari natijasida har bir hududdan uchtadan eng kuchli jamoalar respublika bosqichi uchun saralab olindi.

Shunday qilib, 9 oktabr kuni Toshkent shahrida mamlakatimizning eng zukko maktablaridan kelgan 42 ta jamoa (294 nafar o‘quvchi) g‘oliblik uchun bellashdi.

His-hayajonga boy bo‘lgan respublika bosqichida quyidagi jamoalar g‘olib bo‘ldi:

1-o‘rin - Farg‘ona viloyati Farg‘ona tumanidan 36-sonli maktab jamoasi;

2-o‘rin - Samarqand viloyati Nurobod tumanidan 11-sonli maktab jamoasi;

3-o‘rin - Samarqand viloyati Paxtachi tumanidan 12-sonli maktab jamoasi.

Mazkur jamoalarning har bir a’zosiga hamda murabbiyiga “Zakovat intellektual klubi” NNT tomonidan qimmatbaho noutbuklar sovg‘a qilindi.

Endilikda ushbu jamoalar a’zolari oliy ta’lim muassasalariga bazaviy to‘lov kontrakt asosida imtihon sinovlarisiz qabul qilinadi.

Shuningdek, ularning har biriga bir o‘quv yili davomida har oy quyidagi miqdorda "Zakovat" stipendiyasi to‘lab boriladi:

1-o‘rin: BHMning 5 baravari (1,5 mln so‘m, yil davomida jami 18 mln so‘m);

2-o‘rin: BHMning 4 baravari (1,2 mln so‘m, yil davomida jami 14,4 mln so‘m);

3-o‘rin: BHMning 3 baravari (900 ming so‘m, yil davomida jami 10,8 mln so‘m).

Bundan tashqari, respublika bosqichida kuchli uchlikka kira olmagan jamoalarning har bir a’zosi va murabbiyiga bukrider va kitoblar esdalik sovg‘alar sifatida taqdim etildi.