Samarqandda «YeI – Markaziy Osiyo» formatidagi vazirlar yig‘ilishi bo‘lib o‘tadi

Dushanbe shahrida tashrif bilan bo‘lgan O‘zbekiston tashqi ishlar vaziri Vladimir Norov Yevropa ittifoqining Markaziy Osiyo bo‘yicha maxsus vakili Teri Xakala bilan uchrashdi.

Foto: Dunyo

Yevropa ittifoqi bilan investitsiya, savdo, fan-ta’lim, ekologiya, turizm va boshqa sohalarda hamkorlikni yanada mustahkamlash va rivojlantirishning dolzarb masalalari muhokama qilindi.

Tomonlar turli daraja va shakllarda rejalashtirilgan tadbirlar, jumladan, 2022 yil 17-18 noyabr kunlari Samarqand shahrida bo‘lib o‘tadigan «YeI – Markaziy Osiyo» formatidagi vazirlar yig‘ilishi va Barqaror rivojlanish uchun «Global darvoza» mavzusidagi o‘zaro bog‘liqlik bo‘yicha xalqaro konferensiya tashkiliy jihatlari yuzasidan fikr almashdi.

Savdo-iqtisodiy hamkorlikni kengaytirishga alohida e’tibor qaratildi. 2022 yil yanvar-sentabr oylarida YeI mamlakatlari bilan o‘zaro savdo hajmi 3,13 milliard AQSh dollarini tashkil etib, o‘tgan yil shu davriga nisbatan 14,8 foizga o‘sgani kuzatildi. Iqtisodiy diplomatiyani faollashtirish va investitsiya loyihalarini amalga oshirish bo‘yicha takliflar muhokama qilindi.