Aholini dori vositalari bilan ta’minlash chora-tadbirlari belgilandi

Prezidentning «Aholini sifatli dori vositalari va tibbiy buyumlar bilan ta’minlash yuzasidan qo‘shimcha chora-tadbirlar to‘g‘risida»gi qarori qabul qilindi.  

2023 yil 1 yanvardan boshlab tasdiqlangan ro‘yxatda belgilangan dori vositalaridan tashqari barcha yangi dori vositalari ishlab chiqarish sharoitlari «Zarur ishlab chiqarish amaliyoti – GMP» talablariga muvofiqligi o‘rganilganidan so‘ng klinik tadqiqotlar ijobiy natijasi asosida davlat ro‘yxatidan o‘tkaziladi.

Bunda alohida dori vositalarini klinik tadqiqotlarsiz davlat ro‘yxatidan o‘tkazish Sog‘liqni saqlash vazirligi tomonidan belgilangan tartibga muvofiq amalga oshiriladi. Quyidagilar bekor qilinadi:

• retsepsiz beriladigan dori vositalari ro‘yxatini Sog‘liqni saqlash vazirligi tomonidan tasdiqlash. Bunda dori vositalari retsept bo‘yicha va retsepsiz berilishi ular tibbiyotda qo‘llanilishiga doir yo‘riqnomalarda belgilangan tartibda amalga oshiriladi;
• dori moddalarini (substansiyalarni) davlat ro‘yxatidan o‘tkazish;
• O‘zbekistondan tashqarida amalga oshirilgan dori vositalari ro‘yxatdan o‘tkazish natijalarini tan olishda standart namunalarini talab etish.

Davlat tibbiy sug‘urtasi jamg‘armasi orqali moliyalashtiriladigan respublika darajasidagi davlat shifoxonalarida bemorlarni dori vositalari va tibbiy buyumlar bilan ta’minlash shifoxona orqali amalga oshiriladi.

Aholini sifatli dori vositalari bilan ta’minlash yuzasidan chora-tadbirlarni amalga oshirish bo‘yicha «yo‘l xaritasi» tasdiqlandi. 2023 yil 1 iyuldan boshlab referent narxlari qayd etilmagan yoki qayd etilgan narxdan yuqori bo‘lgan dori vositalarini sertifikatlashtirish taqiqlanadi.

Dori vositalari chakana savdosida jamoatchilik nazoratini joriy etish maqsadida 2023 yil 1 maydan boshlab: 

• jismoniy shaxslar tomonidan sotib olingan dori vositalari uchun dorixonalar tomonidan taqdim etiladigan xarid cheki fiskal belgisi matritsali shtrix kod (QR-kod) yordamida skanerlash orqali soliq organlari maxsus mobil ilovasida ro‘yxatdan o‘tkazilganda dori vositalari narxlari Farmatsevtika tarmog‘ini rivojlantirish agentligi axborot tizimidagi dori vositalari chakana referent narxlari bilan avtomatik tarzda solishtiriladi;
• matritsali shtrix kod (QR-kod) yordamida skanerlash natijasida dori vositalari chakana narxlariga belgilangan ustamalar oshirib qo‘llanilgani aniqlangan taqdirda, tegishli chora ko‘rish uchun bu haqida iste’molchilar huquqlarini himoya qilish uchun maxsus vakolat berilgan davlat organiga avtomatik ravishda xabar yuboriladi;
• xarid cheki bo‘yicha narx dori vositasi chakana referent narxidan ortiq deb topilganda, ushbu ma’lumot asosida o‘tkazilgan tekshirish yakuniga ko‘ra huquqbuzardan belgilangan tartibda jarima undiriladi.