08:17 / 03.11.2022
5429
Исроилдаги сайловларда собиқ бош вазир Нетаняхунинг блоки ғалаба қозонди

Исроил матбуотига кўра, Нетаняхунинг ўнг қанот диний лагери парламентдаги кўпчилик ўринларни эгаллаган. Бу унга бош вазир лавозимига қайтиш имконини беради.

Фото: Shutterstock

Исроилда муддатидан олдин парламент сайловларида собиқ бош вазир Бенямин Нетаняху бошчилигидаги ўнг қанот партиялар блоки ғалаба қозонди. Сайлов бюллетенларининг 97 фоизини қайта ишлаш натижаларига кўра, Нетаняхунинг ўнг қанот диний лагери Кнессетда энг кўп – 120 тадан 65 та ўринга эга бўлди, деб хабар бермоқда 2 ноябрь, чоршанба куни маҳаллий ОАВ. Дастлабки маълумотларга кўра, энг кўп – 32 ўрин собиқ бош вазирнинг «Ликуд» миллий-либерал партиясига насиб этади.

Иккинчи ўринда амалдаги бош вазир Яир Лапиднинг «Еш Атид» партияси бўлиб, у парламентда 24 ўринни эгаллайди. Бенямин Нетаняху учун Бецалел Смотрич ва Итамар Бен-Гвирнинг ўта ўнгчи Диний сионизм партияси ҳал қилувчи аҳамиятга эга бўлади, дея қайд этади dpa агентлиги. У 14 ўринни қўлга киритиб, Кнессетдаги учинчи йирик партияга айланиши кутилмоқда. Ўнг қанот экстремистик альянс Нетаняхуга яна Исроил ҳукуматини бошқаришга имкон беради.

Исроилда сўнгги уч ярим йил ичида бешинчи сайловда иштирок этганлар сони юқори бўлгани тахмин қилинмоқда. Сайлов участкалари ёпилган вақтга келиб, 1 ноябрь оқшомида у 71,3 фоизни ташкил этди.

Сайловнинг расмий натижалари 3 ноябрь, пайшанба куни эълон қилинади. Исроил президенти Ицхак Герцог улар ҳақида 9 ноябрь куни хабардор қилинади, шундан сўнг у 16 ноябргача ҳукуматни шакллантиришни кимга топширишни ҳал қилиши керак. Бу номзодга коалиция тузиш учун 28 кун берилади.

73 ёшли Бенямин Нетаняху учун бу бош вазир лавозимига иккинчи марта қайтиши бўлади. Исроилда бошқа ҳеч бир сиёсатчи бу лавозимни ундан кўра кўпроқ эгалламаган. Нетаняху ҳукуматни 1996 йилдан 1999 йилгача, кейин эса 2009 йилдан 2021 йилгача бошқарган. Нафтали Беннет ўтган йили саккиз партиядан иборат коалиция раҳбарида унинг ўрнини эгаллаганидан сўнг, Нетаняху даври тугади деб тахмин қилинди. Бироқ июнь ойида ўнг ва сўллардан иборат кенг кўламли сиёсий кучлардан иборат коалиция парчаланиб кетди. Охир-оқибат бош вазир лавозимини ташқи ишлар вазири Яир Лапид эгаллади.

Исроилда Бенямин Нетаняху фирибгарлик, коррупция ва давлатга хиёнатда айбланмоқда. Сиёсатчи барча айбловларни рад этди. Агар суд уни коррупцияда айбдор деб топса, қонунга мувофиқ 10 йилгача озодликдан маҳрум этилиши мумкин. Қолган айбловлар бўйича максимал жазо уч йил қамоқдир.

Top