“Lyuboy” ishni bittada bitiradigan” profilaktika inspektori jazosiz qoldi

Samarqandning Past Darg‘om tumanida ishlovchi profilaktika inspektori fuqaroning “Equinox” avtomobilini dabdala qilgani, lekin unga chora ko‘rilmayotgani haqida Kun.uz oktyabr oyi boshida xabar bergan edi.

Noyabr oyi boshida esa Samarqand viloyati ichki ishlar boshqarmasi boshlig‘i Rahmat Mamatov tanqidiy yig‘ilish o‘tkazdi va unda 19 nafar profilaktika inspektori ishdan olindi. Kun.uz'ga ma’lum bo‘lishicha, o‘sha yig‘ilishga past darg‘omlik profilaktika inspektori Salohiddin Pardaqulov ham chaqirtirilgan.

Manbamizga ko‘ra, inspektor Pardaqulov boshqaga tegishli “Equinox”ni hujjatsiz boshqarib, YTH sodir etgani va zararni to‘lab bermayotgani uchun boshqarma boshlig‘i tomonidan qattiq tanbeh olgan. Inspektorning otasi ham yig‘ilishda turg‘azib qo‘yilgan.

“Vijdoning bo‘lsa, mashinalarning zararini to‘lab ber. Tizim sha’niga isnod keltirding. Jamoatchilikning haqli e’tirozlariga sabab bo‘lding”, degan Mamatov.

Boshqarma boshlig‘i profilaktika inspektorining xatti-harakati, ichki ishlar organlari xodimlarining odob-axloq qoidalarini buzgani sababli mas’ul o‘rinbosarlariga qonuniy qaror qabul qilish uchun topshiriq bergan.

Ammo, yig‘ilishdan o‘tganiga 10 kundan oshgan bo‘lsa-da, zarar ham qoplab berilmagan, inspektorga chora ham ko‘rilmagan.

Eslatib o‘tamiz, Salohiddin Pardaqulov 2022 yilning 20 yanvar kuni o‘zi ishlayotgan mahalladagi fuqaroning mashinasini hujjatsiz boshqargan. U avtomobilda yo‘l harakati qoidalarini bir necha marta qo‘pol tarzda buzgan. Aynan YTH sodir etilishidan avvalgi holatlar ham videoregistratorga yozib olingan. Biroq sudda boshqa fuqaro aybdor deb topilgan va “Equinox”ga yetkazilgan 62,5 million so‘m zararni u to‘lashi belgilangan.

Kun.uz manbasiga ko‘ra, IIB boshlig‘i Mamatov ham asl vaziyat qanday bo‘lganini inobatga olib, profilaktika inspektorini mard va vijdonli bo‘lishga chaqirgan.