Jorjiyadagi saylovlardan keyin demokratlar Senatdagi pozitsiyasini mustahkamladi

AQSh Senatiga Jorjiya shtatidan bo‘lib o‘tgan saylovlarda Demokratik partiyadan nomzod Rafael Uornok ovoz berishning ikkinchi bosqichida kutilganidek g‘alaba qozondi. Bu haqda Amerika OAV 7 dekabr, chorshanba kuni telekompaniyalar prognozlariga tayanib xabar berdi. Uornok AQSh sobiq prezidenti, respublikachi Donald Tramp tomonidan qo‘llab-quvvatlangan sobiq amerikalik futbol yulduzi Hershel Uokerni ortda qoldirdi.

Uornokning g‘alabasi shuni anglatadiki, demokratlar Kongressga oraliq saylovlar arafasida o‘tkazilgan so‘rov natijalaridan farqli o‘laroq, hatto Senatdagi o‘z pozitsiyalarini mustahkamlashga muvaffaq bo‘lishdi: agar saylovgacha demokratlar va respublikachilar yuqori palatada 50 ta o‘ringa ega bo‘lgan bo‘lsa, hozir AQSh prezidenti Jo Bayden tarafdorlari yana bir qo‘shimcha ovozga ega bo‘ladi.

Noyabr oyida bo‘lib o‘tgan Kongressga oraliq saylovlarda nomzodlarning hech biri 50 foizdan ko‘p ovoz to‘play olmagani uchun Jorjiyada ikkinchi tur o‘tkazilishi zarur edi. Bunga qisman Jorjiyada Senatga uchta nomzodning da’vogarligi sabab bo‘lgan.

Jo Baydenning Demokratik partiyasi 8 noyabr kungi oraliq saylovlar natijasiga ko‘ra, Vakillar palatasida ko‘pchilik o‘rinni yo‘qotdi. Shu bilan birga, demokratlar so‘rovlarda taxmin qilinganidek jiddiy mag‘lubiyatga uchragani yo‘q. Demokratlar Senatdagi oz o‘rnini himoya qilishga muvaffaq bo‘ldi. Bu Bayden tarafdorlarining Kongressda ishlashini osonlashtiradi.