O‘zbekistonning JSTga a’zo bo‘lish jarayoni jadallashtiriladi

Investitsiyalar va tashqi savdo vaziri o‘rinbosari, Jahon savdo tashkiloti (JST) bilan ishlash bo‘yicha muzokaralar guruhi rahbari Badriddin Obidov O‘zbekistonning tashkilotga a’zo bo‘lishi uchun JSTga a’zo davlatlar bilan bir qator ikki tomonlama muzokaralar o‘tkazish hamda UNCTAD/JST xalqaro savdo markazi (XSM) tomonidan tashkil etilgan tashqi savdo strategiyalari forumida ishtirok etish uchun Jyenevaga keldi.

Tashrif davomida AQSh, Yevropa Ittifoqi, Xitoy, Saudiya Arabistoni, Qatar, Turkiya, Singapur kabi 14 davlatlar tashkilotdagi diplomatik vakolatxonalari rahbarlari va ekspertlari bilan O‘zbekiston JSTga a’zo bo‘lishi yuzasidan navbatdagi muzokaralar olib borildi. JST bosh direktori o‘rinbosari Jan-Mari Pogam va tashkilot kotibiyati qo‘shilish bo‘limi boshlig‘i Mayk Oshikava bilan uchrashuvlar bo‘lib o‘tdi.

Muzokaralar chog‘ida O‘zbekiston JSTga a’zo bo‘lishi bo‘yicha ishchi guruhi 6-yig‘ilishini tashkil etishga tayyorgarlik ko‘rish yuzasidan amalga oshirilayotgan ishlar, bu jarayonni yanada jadallashtirish bo‘yicha amaliy chora-tadbirlar bilan bog‘liq masalalar muhokama qilindi. JSTga a’zo davlatlar bilan bozorlariga respublika tovar va xizmatlari chiqishi bo‘yicha alohida muzokaralar olib borildi.

Davlatlar vakillari va JST kotibiyati ta’kidlashicha, O‘zbekiston tashkilotga a’zo mamlakatlarga ishchi guruh 6-yig‘ilishini tashkil etish uchun barcha zarur yangi hujjatlarni, manfaatdor davlatlar savollariga yozma javoblarni, milliy qonunchilikni JST qoidalariga muvofiqlashtirishga qaratilgan choralar rejasi, sanitariya va fitosanitariya choralari, savdodagi texnik to‘siqlar, bojxona qiymatini baholash, intellektual mulk, tovarlar importini litsenziyalash va boshqa masalalar bo‘yicha yangilangan hujjatlarni taqdim etgan.

Muzokaralar yakunida O‘zbekiston JSTga a’zo bo‘lish jarayonini yanada jadallashtirish, tashkilot tadbirlar jadvaliga muvofiq, 2023 yil boshida ishchi guruh 6-yig‘ilishini o‘tkazish bo‘yicha kelishuvga erishildi.

8-9 dekabr kunlari investitsiyalar va tashqi savdo vaziri o‘rinbosari B. Obidov boshchiligidagi O‘zbekiston delegatsiyasi Tashqi savdo strategiyalari forumida ishtirok etdi.

Munozaralar davomida O‘zbekiston delegatsiyasi mamlakatda tashqi savdoni erkinlashtirish sohasida amalga oshirilayotgan islohotlar natijalari, qabul qilingan me’yoriy-huquqiy hujjatlar va ma’muriy chora-tadbirlar, elektron tijorat bo‘yicha milliy strategiya loyihasini ishlab chiqish to‘g‘risida batafsil ma’lumot berdi.