Nukusdagi tartibsizliklar bo‘yicha 39 nafar sudlanuvchiga sud hukmi e’lon qilindi

Oliy sud xabariga ko‘ra, jinoyat ishi Qoraqalpog‘iston Respublikasi sudining jinoyat ishlari bo‘yicha sudlov hay’ati sudyasi Dauletbay Razov raisligida birinchi instansiya sudida ko‘rib chiqildi.

E’lon qilingan sud hukmiga ko‘ra:

Islam Polatov Jinoyat kodeksining 244-moddasi (ommaviy tartibsizliklar) 3-qismi va 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “a”, “g” bandlarida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi (yengilroq jazo tayinlash) qo‘llanib, 59 (bir necha jinoyat sodir etganlik uchun jazo tayinlash), 60 (bir necha hukm yuzasidan jazo tayinlash) moddalari tartibida 5 yil;

Polat Yesengeldiyev Jinoyat kodeksining 244-moddasi 3-qismi va 244-1-moddasi 3-qismi “a” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi qo‘llanib, 59-moddasi tartibida 6 yil;

Kamal Yeshjanov va Islambek Aitmuratov Jinoyat kodeksining 244-moddasi 3-qismida nazarda tutilgan jinoyatni sodir etganlikda aybli deb topilib, ularning har biriga Jinoyat kodeksining 57-moddasi qo‘llanib, 6 yildan;

Nursultan Baylepesov va Alpamys Jumabekov Jinoyat kodeksining 244-moddasi 3-qismi va 28,247-moddasi (o‘qotar qurolni, o‘q-dorilarni, o‘qotar qurolning asosiy qismlarini, portlovchi moddalarni, portlatish vositalarini yoki portlatish qurilmalarini qonunga xilof ravishda egallash) 3-qismi “a” bandida nazarda tutilgan jinoyatlarni sodir etganlikda aybli deb topilib, ularning har biriga Jinoyat kodeksining 57-moddasi qo‘llanib, 59-moddasi tartibida 6 yildan;

Dauletkeldi Nadirbayev, Adilbek Sariyev, Kongratbay Bekpolatov, Ruslan Baimbetov, Quanyshbay Baxiyev, Islam Saparov, Zairbek Pirjanov, Raximjan Jumabayev, Aydos Yesemuratov, Kuanyshbay Begaliyev va Manas Raxmanov Jinoyat kodeksining 244-moddasi 3-qismida nazarda tutilgan jinoyatni sodir etganlikda aybli deb topilib, ularning har biriga Jinoyat kodeksining 57-moddasi qo‘llanib, 7 yildan;

Nusret Bauyetdinov Jinoyat kodeksining 244-moddasi 3-qismida nazarda tutilgan jinoyatni sodir etganlikda aybli deb topilib, unga Jinoyat kodeksining 57-moddasi qo‘llanib, 7 yil 6 oy;

Nursultan Duysenbayev Jinoyat kodeksining 244-moddasi 3-qismi va 28,247-moddasi 3-qismi “a” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi qo‘llanib, 59-moddasi tartibida 7 yil 6 oy;

Rustam Dosimbetov, Nuratdiyin Xabipov va Zamirbek Tadjimuratov Jinoyat kodeksining 244-moddasi 3-qismida nazarda tutilgan jinoyatni sodir etganlikda aybli deb topilib, ularning har biriga Jinoyat kodeksining 57-moddasi qo‘llanib, 8 yildan;

Azamat Allanazarov Jinoyat kodeksining 244-moddasi 3-qismi va 247-moddasi 3-qismi “a” bandida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi qo‘llanib, 59-moddasi tartibida 8 yil;

Asilbek Omirzakov Jinoyat kodeksining 244-moddasi 3-qismi va 166-moddasi (talonchilik) 2-qismi “a”, “v” bandlarida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi qo‘llanib, 59-moddasi tartibida 8 yil;

Sharapat Ashirbekov Jinoyat kodeksining 244-moddasi 3-qismi va 244-1-moddasi 3-qismi “a”, “g” bandlarida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi qo‘llanib, 59-moddasi tartibida 8 yil;

Dao‘ranbek Ramanov Jinoyat kodeksining 244-moddasi 3-qismi va 244-1-moddasi 3-qismi “a”, “g” bandlarida nazarda tutilgan jinoyatlarni sodir etganlikda aybli deb topilib, unga Jinoyat kodeksining 57-moddasi qo‘llanib, 59-moddasi tartibida 9 yil;

Omirbek Kurbanov Jinoyat kodeksining 244-moddasi 3-qismi va 244-1-moddasi 3-qismi “a”, “g” bandlarida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasi tartibida 10 yil 6 oy;

Oralbay Dosnazarov Jinoyat kodeksining 244-moddasi 3-qismi va 244-1-moddasi 3-qismi “a”, “g” bandlarida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasi tartibida 11 yil ozodlikdan mahrum qilish jazosi tayinlandi.

Ozodlikdan mahrum qilish jazosiga hukm etilganlarga nisbatan tayinlangan jazo muddatlarini ular qamoqqa olingan kundan boshlab hisoblanib, 1 nafar sudlanuvchi jazoni qattiq tartibli koloniyada, 27 nafar sudlanuvchi jazoni umumiy tartibli koloniyalarda o‘tash belgilandi.

Alimbay Myrzambetov, Muratbay Pirlepesov, Alisher Sharapov, Ongarbay Mamutov, Timurbek Ismailov, Rasul Sultaniyazov, Abzal Naurizbayev, Nurmuxammed Genjyebayev va Amantay Seytmuratov Jinoyat kodeksining 244-moddasi 3-qismida nazarda tutilgan jinoyatni sodir etganlikda aybli deb topilib, ularning har biriga Jinoyat kodeksining 57-moddasi qo‘llanib, 5 yildan;

Abdimalik Xojanazarov va Yesimqan Qanaatov Jinoyat kodeksining 244-moddasi 3-qismi va 244-1-moddasi 3-qismi “a”, “b”, “g” bandlarida nazarda tutilgan jinoyatlarni sodir etganlikda aybli deb topilib, ularning har biriga Jinoyat kodeksining 57-moddasi qo‘llanib, 59-moddasi tartibida 5 yildan ozodlikni cheklash jazosi tayinlandi.

Ozodlikni cheklash jazosiga hukm etilganlarning dastlabki qamoqda o‘tirgan kunlari Jinoyat kodeksining 62-moddasi (ushlab turish, qamoqqa olish yoki uy qamog‘i vaqtini hisobga olish qoidalari) ga asosan tayinlangan jazodan chegirilishi belgilandi va ular sud zalida qamoqdan ozod qilindi.

R. Dosimbetov, A. Allanazarov, N. Duysenbayev, N. Baylepesov, A. Jumabekov, K. Bekpolatov, R. Baimbetov, Q. Baxiyev, I. Saparov, N. Xabipov va Z. Pirjanovning aybidan dastlabki tergov organi tomonidan qo‘yilgan Jinoyat kodeksining 104-moddasi (qasddan badanga og‘ir shikast yetkazish) 3-qismi “a” bandi (ushbu harakatlar Jinoyat kodeksining 244-moddasi 3-qismi bilan qamrab olinganligi sababli) hamda P. Yesengeldiyevning aybidan Jinoyat kodeksining 244-1-moddasi 3-qismi “g” bandi (qo‘yilgan ayblov o‘z tasdig‘ini topmaganligi sababli) chiqarildi.

Sodir etilgan jinoyatlar oqibatida yetkazilgan 6,5 milliard so‘mdan ziyod miqdordagi moddiy zararlarni sudlanuvchilardan solidar tartibda undirish, sudlanuvchilarga tegishli bo‘lib jinoyat ishi doirasida xatlovga olingan mol-mulklarni keltirilgan zararni qoplashga qaratish belgilandi. Hukmdan norozi taraflar Qoraqalpog‘iston Respublikasi sudi orqali Oliy sudning Jinoyat ishlari bo‘yicha sudlov hay’ati apellyatsiya instansiyasiga protsessual qonunchilikda belgilangan tartib va muddatlarda shikoyatlar berishga, prokuror esa protest bildirishga haqli ekanligi ma’lum qilinadi.