Rossiyada ikki viloyat 9 may kuniga belgilangan paradni bekor qildi

Kurskda xavfsizlik nuqtayi nazaridan 9 may kunidagi harbiy parad bekor qilindi, deb xabar berdi Kursk viloyati gubernatori Roman Starovoyt. U bu o‘tgan haftada terrorizmga qarshi kurashni kuchaytirishga qaror qilgan mintaqaviy shtabning pozitsiyasi bilan bog‘liqligini aytdi. «Ushbu qarorni inobatga olgan holda, biz 9 may kuni harbiy parad o‘tkazmaslikka qaror qildik», dedi Starovoyt 10 aprel, dushanba kuni bo‘lib o‘tgan haftalik yig‘ilishda.

Gubernator keyinroq «O‘lmas polk» aksiyalari qaysi formatda va aynan qayerda o‘tkazilishi haqida ma’lumot taqdim etishga va’da berdi.

O‘tgan haftada Belgorod viloyatida 9 may kungi parad bekor qilindi. Gubernator Vyacheslav Gladkov buni «dushmanni qo‘zg‘atishni» istamasligi bilan izohladi. «Belgorod markazida katta miqdorda texnika va harbiy xizmatchilar to‘plansa, bu dushmanni qo‘shimcha harakatlarga qo‘zg‘atishi mumkin, shuning uchun parad o‘tkazilmaydi», dedi u.

Rossiyaning Ukrainaga qarshi urushi fonida Ukraina bilan chegaradosh Kursk, Belgorod va Bryansk viloyatlari hududlari tez-tez o‘qqa tutilmoqda. Yaqinda, 1 aprel kuni Kursk viloyatining Dronovka qishlog‘idagi madaniyat uyi tomiga drondan portlovchi qurilma uloqtirildi. Ertasi kuni Kursk viloyatining Sudjanskiy tumanida, Nikolayevo-Darino qishlog‘ida minomyot hujumi natijasida yetti kishi yaralandi. 5 aprel kuni navbatdagi o‘q uzilishi natijasida bir qancha qishloqlar elektr ta’minotisiz qolgan edi.

Moskvada 9 may kungi parad rejaga muvofiq bo‘lib o‘tadi, biroq unda kuchaytirilgan xavfsizlik choralari ko‘riladi, dedi Rossiya prezidenti matbuot kotibi Dmitriy Peskov.