Moldova Gagauziyasi rahbari saylovida rossiyaparast nomzod g‘alaba qozondi

Moldova tarkibidagi Gagauziya avtonom hududiy okrugi bashkani (rahbari) saylovining ikkinchi bosqichida, mahalliy MSKning 14 may, yakshanba kuni mahalliy vaqt bilan yarim tungacha e’lon qilingan dastlabki ma’lumotlariga ko‘ra, "Shor" partiyasidan nomzod Yevgeniya Gutsul 27 376 ta (52 foiz) ovoz to‘plagan holda g‘alaba qozondi.

Uning raqibi, muxolifatdagi Moldova Respublikasi Sotsialistlar partiyasi tomonidan qo‘llab-quvvatlangan Grigoriy Uzun 24 913 ta (48 foiz) ovoz oldi. Gagauziyada jami 92 mingdan ko‘proq saylovchi ro‘yxatga olingan. MSK saylovlar jiddiy qonunbuzarliklarsiz o‘tgani, ikkinchi turda saylovchilarning 54,5 foizi ishtirok etgani haqida xabar berdi.

Bashkan saylovlarining ikkinchi bosqichi yakuniy natijalari 15 may kuni ertalab soat 9:00 da e’lon qilinadi.

Gutsul ham, Uzun ham - rossiyaparast nomzodlar, siyosiy tajribasi yo‘q. Ularning ikkalasi ham saylovchilarga Rossiya bilan yaxshi aloqalar, arzon gaz va yengilroq tariflarni va’da qilmoqda. 30 aprel kuni bo‘lib o‘tgan birinchi turda Gutsul va Uzun deyarli bir xil natijani ko‘rsatdi – 26 foizdan sal ko‘proq. Yevgeniya Gutsul raqibidan atigi qirqta ovozga ustun keldi.

Gagauziya an’anaviy ravishda Moldovada Rossiya ta’siri zonasi hisoblanadi. Avtonom hududiy okrugning alohida huquqiy maqomi unga mustaqil axborot siyosatini yuritish huquqini beradi - bu yerda Rossiya telekanallari translatsiya qilinadi. Shu sababdan Moldovada hukmron yevropaparast “Harakat va birdamlik” partiyasi gagauzlarning har qanday tanlovini qabul qilishini, asosiysi saylovlar adolatli o‘tishini ta’kidlab, bashkan saylovlariga o‘z nomzodini ko‘rsatmadi. Bashkan, qonunga ko‘ra, avtomatik ravishda Moldova hukumati tarkibiga kiradi.