Taniqli raqqosa Qizlarxon Do‘stmuhammedova 77 yoshida vafot etdi

O‘zbek raqs san’atida o‘z maktabini yaratgan Qizlarxon Do‘stmuhammedova 77 yoshida vafot etdi. U «O‘zbekiston xalq artisti» bo‘lib, «El-yurt hurmati» ordeniga ham loyiq ko‘rilgan.

Raqqosa, o‘zbek raqs san’atida o‘z maktabini yaratgan «O‘zbekiston xalq artisti» Qizlarxon Do‘stmuhammedova 77 yoshida vafot etdi. Bu haqda Madaniyat va turizm vazirligi axborot xizmati xabar qildi.

U 1946 yil 25 oktyabrda Toshkent shahrida tavallud topgan. 1965 yilda Toshkent davlat universitetini, 1977 yilda Toshkent teatr va rassomchilik san’ati institutini (hozirgi San’at va madaniyat instituti) tamomlagan.

Mehnat faoliyatini 1965 yilda O‘zbek davlat filarmoniyasi balet solisti sifatida boshlagan va 1989 yilga qadar faoliyat olib borgan. Keyinroq «O‘zbekiston» teatr-studiyasi solisti (1989−1991), Toshkent davlat madaniyat instituti, «Xalq musiqasi» kafedrasi o‘qituvchisi (1991−1995), xalqaro «Oltin meros» xayriya jamg‘armasi qoshidagi milliy mumtoz raqs dastasining bosh badiiy rahbari sifatida (1999−2005) faoliyat yuritgan.

Qizlarxon Do‘stmuhamedovaning «Go‘zal», «Tong malikasi», «Go‘zal tong», «Intizor», «Buxoro yulduzi», «Sevgi taronasi», «Nozli» kabi zamonaviy, shuningdek, «Munojot», «Tanovar», «Mo‘g‘ulchai segoh», «Qorako‘zim», «Guluzorim», «Savti miskin» kabi mumtoz raqslari mashhur.

«Shashmaqom» telefilmida qatnashgan (1972), «Tanovar» raqs ansambli (Sietl, AQSh)da o‘zbek raqslarini sahnalashtirgan. AQSh Liviya, Fransiya, Germaniya, Tunis kabi mamlakatlarda gastrol safarlarida bo‘lgan.

Do‘stmuhamedova ijodiga bag‘ishlab «Nafosat guldastasi» nomli film ishlangan (1985). «El-yurt hurmati» ordeni bilan mukofotlangan (2000).