«Sevilya» yana Yevropa Ligasida g‘olib. Ularni Mourino ham to‘xtata olmadi

Yengilmaslar to‘qnashuvi

Yevropa Ligasi. Final
Sevilya — Roma 1:1
Penaltilar seriyasi — 4:1.
31 may, «Pushkash Arena»
Gollar: Manchini (55, avtogol) — Dibala (35).
Sevilya – Bunu, Navas (Montel, 95), Bade, Gudel (Markao, 120+8), Telles (Rekik, 95), Rakitich, Fernando (Xordan, 120+8), Okampos, Oliver Torres (Suso, 46), Xil (Lamela, 46), An-Nosiri.
Roma – Patrisiu, Chelik (Zalevski, 91), Smolling, Manchini, Rojyer, Spinatssola (Lorente, 106), Matich (Bove, 120), Kristante, Pellegrini (El-Shaaravi, 106), Dibala (Veynaldum, 68), Abraham (Belotti, 75).
Ogohlantirishlar: Matich (22), , Pellegrini (45), Manchini (48), Kristante (65), Rakitich (65), Chelik (74), Zalevski (105), Lamela (109), Xordan (120), Montel (120+4), Okampos (120+10).

Ringning bir burchagida «Sevilya»: bu turnirdagi g‘alabalari barchani charchatgan va hazil bilan kubok nomi ularning nomi bilan atala boshlangan klub. Boshqa burchakda Joze Mourino: XXI asr futbolining nomdor shaxslaridan biri, «Roma»ni qatorasiga ikkinchi bor qit’a turniri finaliga olib chiqqan va navbatdagi titulni qo‘lga kiritishni ko‘zlagan murabbiy. Bungacha «Sevilya» Yevropa Ligasi finallariga olti bor chiqib, olti marta g‘olib bo‘lgan, Mourino — yevrokuboklarda besh finalda besh g‘alaba, agar Superkubok hisobga olinmasa. Qaytarib bo‘lmagan kuch o‘rnidan qo‘zg‘atib bo‘lmagan obekt bilan to‘qnashdi va kimdir bu safar yengilishi kerak edi.

Bu o‘yindan oldin ham raqiblarning taktikasidan kelib chiqqan holda ko‘p gol bo‘lishi kutilmayotgandi. Mourino, bu qanchalik stereotip tuyulmasin, Mourinoligicha qolishi aniq edi, andalusiyaliklarning o‘yini esa, mart oyida Xose Luis Mendilibara bosh murabbiylikka tayinlanganidan keyin sezilarli darajada soddalashdi. Ha, uning qo‘li ostidagi futbolchilar texnik ustunlikka ega, ammo bunday o‘yinda bu o‘z ahamiyatini yo‘qotadi.

Ayyor Joze

O‘yin qanday kechishi ilk daqiqalardanoq ko‘rinib turardi. Dastlabki yarim soatda raqiblar darvozaga berilgan zarbalardan besh barobar ko‘proq qoida buzishdi. Lekin bu vaqt oralig‘ida bitta golli vaziyat ham yuzaga keldi: Spinatssola to‘pni o‘ziga yaxshi bo‘ysundirib zarba berdi, ammo «Sevilya» posboni Bunu zarbani qaytara oldi. Qolgan vaqtda — kurash, kurash va yana kurash kechdi. Bu kurash shunchalik qattiq ediki, futbolchilar muntazam ravishda gazonga yumalab, og‘riqdan baqirishardi. Birinchi bo‘limning o‘ziga yetti daqiqa qo‘shib berilishi bejiz emasdi — agar maydondagi voqealar jahon chempionatida kechganida, hakamlar 20 daqiqa qo‘shgan bo‘lardi.

O‘yinda tez-tez pauza yuzaga kelishi «Roma»ning foydasiga xizmat qildi. Katta ehtimol bilan, Mourino shogirdlariga o‘yinni sun’iy cho‘zish bo‘yicha ko‘rsatma bergan: «Sevilya»ning texnar va chopag‘on futbolchilari bunday holatda faollasha olmasdi, chunki o‘yin doimiy ravishda follar bilan to‘xtatib turildi. Ispanlarda birinchi bo‘limdagi eng kuchli o‘tkazilgan davr to‘xtalishlar bo‘lmagan qo‘shib berilgan daqiqalarga to‘g‘ri keldi, Rakitichning zarbasi ustunga tegdi.

Mourinoning yana bir o‘ziga xosligi — ayyorlik. Uning o‘yindan oldingi matbuot anjumani an’anaviy tarzda qizg‘in chiqdi, ammo uning yakunida jurnalistlardan biri mikrofonsiz holatda surbetlik bilan portugaliyalik mutaxassis ortidan italyan tilida baqirib qoldi: «Dibala qancha vaqt o‘ynaydi?!» Allaqachon stoldan turib ketib bo‘lgan Mourino javob bermaslik huquqiga ega bo‘lsa-da, shunday dedi: «20-30 daqiqa». Finalning 35-daqiqasida esa — Dibala hisobni ochdi.

Mendilibarning o‘yinda burilish yasashi

Bu vaqtga kelib o‘yin sur’ati tomoshabinlarning esnog‘ini keltirayotgandi. Ammo bu Jozening uslubi: raqibni uxlatib qo‘yish va kutilmaganda urilgan gol bilan uyg‘otish. Shu ma’noda, bo‘lim oxirida Rakitich ham uxlab qolgandi: Kristante to‘pni xorvatiyalik futbolchidan olib qo‘ydi, Manchini esa Dibalaga assistentlik qildi.

Ammo «Sevilya» o‘z vaqtida uyg‘ondi va bunda Mendilibarning xizmati katta. Andalusiyaliklar ustozi tanaffusda hujumdagi futbolchilardan ikkisini — birinchi 45 daqiqalikda samarali harakatlana olmagan Xil va Torresni zaxiraga olishdan tortinmadi. Ikkinchi bo‘limda «Sevilya» to‘pga egalik qila boshladi va shturmni haqli ravishda gol bilan yakunladi — standart qanot hujumi Manchinining avtogoliga olib keldi.

Hisob 1:1 ekanida tashabbus to‘liq «Sevilya» tomonida bo‘ldi. Ispanlar qo‘shimcha vaqt va penaltilar seriyasiga rozi emasdek, «Roma» esa voqealarning bunday rivojiga qarshi emasdek ko‘rindi. Mourino Dibala o‘rniga qo‘shimcha havbek sifatida Jorjino Veynaldumni tushirdi. Paulo 68 daqiqa maydonda bo‘ldi. Jahon chempioni yaxshi o‘yin o‘tkazdi – gol urdi, jamoani olg‘a boshladi, 33 bor to‘p  bilan muomila qildi va uzatmalarining 77 foizi aniq chiqdi. Dibalasiz «Roma» standart vaziyatlarga tayandi. Lekin jarima zarbasidan uzatilgan to‘pni Abraham qulay vaziyatda turib darvoza to‘riga joylay olmadi. Abrahamning o‘rniga tushgan Andrea Belotti ham qulay vaziyatni (yana ayyorona ijro etilgan jarima zarbasidan keyin) yo‘qqa chiqardi.

Agar VAR bo‘lmaganida, Yevropa Ligasi finalini hakamning qo‘pol xatosi hal qilgan bo‘lardi. Jarima maydoni ichida Ibanes va Okamposning to‘qnashuvidan keyin Teylor «Roma» darvozasiga penalti qo‘ydi. Lekin videotakrordan keyin Lukas «dayving» qilgani – himoyachi esa to‘pga o‘ynagani aniqlandi. Ikki jamoa futbolchilari ham bu o‘yinda bir necha bor 11 metrlik jarima zarbasini so‘rashdi. Yakunda hakam ularni penaltilar seriyasiga taklif etdi.

Overtaymlar futbol nuqtayi nazaridan voqealarga boy bo‘lmadi, ammo haddan ortiq uzoq davom etdi. Ko‘plab jarohatlar, follar, pauzalar va bahslar taassurotni buzadi, ammo «Roma» texnik zonasi odatdagi kabi qizg‘in edi — vaziyatlardan birida Mourino zaxira hakami Maykl Oliver bilan mushtlashib ketishi ham mumkin edi.

Smollingning ikkinchi ekstra bo‘limga qo‘shib berilgan 11-daqiqadagi zarbasi darvoza to‘siniga tegishi bilan o‘yin yakunlandi va penaltilar seriyasiga o‘tildi.

Unda barchasini Manchini va Ibanyyesning xatoga yo‘l qo‘yishi hal qildi — ularning birinchisi to‘pni Bununing o‘ziga tepdi, ikkinchisi ustunni mo‘ljalladi.

Shundan keyin Argentinaning JCh finalidagi penaltilar seriyasida yakuniy zarbani bergan Montiyel nuqtaga yaqinlashdi va «Sevilya» Yevropa Ligasidagi yettinchi g‘alabaga erishdi. Ispan klubi ichki chempionatdagi yomon natijalariga qaramay mavsumni sovrinsiz yakunlamaydigan bo‘ldi va keyingi mavsumda yana YeChLda qatnashadi.

Mourino esa faoliyatida ilk bor yevrokuboklar finalida yutqazdi va kumush medalini «Roma» muxlislari tomon otdi.