Boshlang‘ich sinf o‘quvchilariga planshetlar tarqatiladi

Saylovoldi dasturining ta’limga oid bandida ta’kidlanganidek, Xorazm bog‘chalarida kompyuter sinflarini tashkil qilish, boshlang‘ich sinf o‘quvchilariga planshet tarqatish boshlanadi, deya xabar qilmoqda Kun.uz muxbiri.

“Xorazmning “tashrif qog‘ozi” IT bo‘ladi. Avvalo, “maktab – oliygoh – IT kompaniyasi”dan iborat yaxlit IT ta’lim va xizmatlar zanjiri yaratiladi”, dedi Mirziyoyev. Buning uchun, viloyatda yetti yilga mo‘ljallangan, raqamlashtirish sohasida “Muhammad al-Xorazmiy vorislari” deb nomlangan loyihaga start beriladi.

Bog‘chalarda kompyuter sinflarini tashkil qilish, boshlang‘ich sinf o‘quvchilariga planshet tarqatishning birinchi bosqichida Xorazm viloyatdagi 543 ta maktabdan 110 tasi tanlab olinib, boshlang‘ich sinf o‘quvchilariga “noutbuk” olib beriladi.

Shuningdek:

• yuqori sinflarda dasturlash, veb-dizayn kabi sohalar kasb sifatida o‘qitiladi;
• Xorazmning barcha bog‘cha va maktablari filtrlangan ichimlik suvi bilan to‘liq ta’minlanadi;
• 2030 yilga qadar maktabgacha ta’limga bo‘lgan ehtiyoj to‘liq qoplanadi va qamrov hozirgi 79 foizdan 100 foizga yetkaziladi;
• qariyb 2 trillion so‘m mablag‘ hisobiga 500 ga yaqin yangi bog‘chalar tashkil etiladi.

Shuningdek, kelgusi yetti yilda zamonaviy maktablar barpo etish, mavjudlarining quvvatini oshirish hisobiga qo‘shimcha 90 ming o‘quvchi o‘rni yaratiladi. Natijada, viloyatda o‘quvchisi 30 nafardan ko‘p bo‘lgan sinflar qolmaydi, deb ta’kidladi nomzod (hozirda 2 mingdan ziyod sinfda 35 ta va undan ko‘p bola o‘qiydi).