Nodir Jumayev Qonunchilik palatasi Sanoat, qurilish va savdo masalalari qo‘mitasi raisi lavozimiga saylandi 

Majlisda Nodir Jumayev Oliy Majlis Qonunchilik palatasining Sanoat, qurilish va savdo masalalari qo‘mitasi raisi lavozimiga saylandi.

Nodir Jumayev 1976 yil Toshkent shahrida tug‘ilgan. 1997 yilda Toshkent moliya institutini tugatgan, 2001 yilda esa O‘zbekiston Bank-moliya akademiyasini tamomlagan. 

1996—2002 yillarda Markaziy bankda yetakchi iqtisodchi, boshqarma boshlig‘i, so‘ngra boshqarma boshlig‘i lavozimlarida ishlagan.

2002—2006 yillarda Toshkent moliya instituti dotsenti, kafedra mudiri, 2005—2009 yillarda Bank-moliya akademiyasi ilmiy ish professori, 2009—2010 yillarda Jahon iqtisodiyoti va diplomatiya universitetining moliya-xo‘jalik faoliyati bo‘yicha prorektori bo‘lgan. 

2010 yilda Oliy Majlis Qonunchilik palatasining Mehnat va ijtimoiy masalalar qo‘mitasi raisi lavozimida ishlagan.

2010—2012 yillarda Toshkent davlat iqtisodiyot universiteti rektori, 2012—2015 yillarda esa Jahon iqtisodiyoti va diplomatiya universiteti rektori lavozimlarini egallagan. 2017 yildan O‘zbekiston Respublikasi Bank-moliya akademiyasi professori.

U 2020 yilda O‘zbekiston Respublikasi Oliy Majlisi Qonunchilik palatasi deputati etib saylangan. Tadbirkorlar va ishbilarmonlar harakati – O‘zbekiston Liberal-demokratik partiyasi fraksiyasi a’zosi. 

Shuningdek, yalpi majlisda Kozim Tojiyev Oliy Majlis Qonunchilik palatasining Mudofaa va xavfsizlik masalalari qo‘mitasi raisi o‘rinbosari lavozimiga saylandi.

Kozim Tojiyev 1984 yil Navoiy viloyati, Navbahor tumanida tug‘ilgan.  U 2007 yil Tojiyev Navoiy davlat pedagogika institutini tamomlagan. 

2015 yilda O‘zbekiston Respublikasi Oliy Majlis Qonunchilik palatasiga saylangan, 2020 yilda esa yana bir muddatga saylangan hamda O‘zbekiston Respublikasi Oliy Majlis Qonunchilik palatasining Mudofaa va xavfsizlik masalalari qo‘mitasi a’zosi lavozimiga tayinlangan.