O‘zbekistonda alifbo islohoti bo‘yicha qonun qabul qilindi

Oliy Majlis Qonunchilik palatasi 7 iyun kungi majlisida “Lotin yozuviga asoslangan o‘zbek alifbosini joriy etish to‘g‘risida”gi O‘zbekiston Respublikasi Qonuniga o‘zgartirish kiritish haqida”gi qonun loyihasini qabul qildi.

Loyihada lotin yozuviga asoslangan o‘zbek alifbosi 26 ta harf va 3 ta harflar birikmasi o‘rniga, 28 ta harf va 1 ta tutuq belgisidan tashkil topishi, shuningdek, ayrim harflarning qo‘llanilishiga aniqlik kiritilishi nazarda tutilmoqda.

Ko‘zda tutilgan o‘zgarishlar:

• Gʻ gʻ → Ğ ğ
• Oʻ oʻ → Ö ö
• Sh sh → Ş ş
• Ch ch → Ç ç
• ng harfi alifbodan chiqariladi.

O‘zgarishlar kuchga kirishi uchun qonun Senat tomonidan ma’qullanib, Prezident tomonidan imzolanishi kerak bo‘ladi.

Qayd etish lozim, qonun loyihasi jamoatchilik muhokamasidan o‘tkazilmadi. Shuningdek, aynan qanday o‘zgarishlar haqida gap ketayotgani ham bir muddat aniq bo‘lmay turdi – palata rasmiy axborotida bunga aniqlik kiritilmagan. Qolaversa, yalpi majlis faqatgina Qonunchilik palatasining rasmiy saytidagina efirga uzatilgan bo‘lib, saytda efirni ortga qaytarib tomosha qilish imkoniyati yo‘q. Bunday imkoniyat YouTube'da bor edi, lekin Qonunchilik palatasi – Senatdan farqli o‘laroq – o‘z majlislarini YouTube'da jonli efirga uzatish amaliyotini to‘xtatib qo‘ygan.

“Bosqichma-bosqich joriy etiladi”

Rasmiy xabarda aytilishicha, qonun loyihasi amaliyotda bosqichma-bosqich joriy etiladi. Xususan, qonun kuchga kirguniga qadar rasmiylashtirilgan hujjatlar, milliy valuta va qimmatli qog‘ozlarning amal qilishi saqlab qolinadi.

Shuningdek, davlat organlari va tashkilotlarining ramziy belgilari, peshlavha va ko‘rsatkichlari hamda boshqa atributlardan belgilangan muddatgacha o‘zgarishsiz foydalaniladi.

“Bu yondashuv davlat organlari va tashkilotlarida amalda foydalanilayotgan hujjatlar, blankalar, peshlavhalar, ko‘rsatkichlar va boshqa moddiy vositalarni bir vaqtning o‘zida almashtirish zaruratini bartaraf etadi. Natijada davlat budjeti mablag‘larining asossiz sarflanishining oldi olinadi, qo‘shimcha davlat xarajatlari yuzaga kelishiga yo‘l qo‘yilmaydi hamda alifbodagi o‘zgarishlarni amalga oshirish davlat organlari va tashkilotlari uchun moliyaviy jihatdan maqbul, bosqichma-bosqich tartibda ta’minlanadi”, – deyiladi parlament axborotida.

Qonun loyihasi deputatlar tomonidan qabul qilinib, Senatga yuborildi.