O‘zbekistonda kambag‘allik darajasi rasman minimal iste’mol xarajatlari (MIX) bilan o‘lchanadi.
MIXni aniqlash tartibi 2021 yil 27 avgustdagi hukumat qarorida belgilangan. Unga ko‘ra, Statistika agentligi minimal iste’mol xarajatlari va kambag‘allik darajasini hisobot yilidagi inflatsiya darajasidan kelib chiqib, keyingi yilning 20 yanvariga qadar e’lon qilib borishi kerak.
Ammo belgilangan muddatdan 5 oy o‘tib ketgan bo‘lsa-da, 2023 yilda kambag‘allik chegarasi hali yangilanmadi. Statistika agentligi mas’ullari Kun.uz muxbirining bu haqdagi savoliga javob berdi.
Agentlik boshqarma boshlig‘i Odiljon Mamadaliyevning aytishicha, 2023 yilda minimal iste’mol xarajatini e’lon qilish statistika dasturiga asosan iyul oyiga belgilangan.
“Minimal iste’mol xarajati ilk bor e’lon qilinganda 2021 yilda VMning 544-son qarori bilan muddat yanvar oyi etib belgilangandi. Ijro muddati so‘nggi qabul qilingan hujjatga asosan belgilanadi. 2023 yil statistika dasturimizda [MIXni e’lon qilish] iyul oyi etib belgilangan, shu muddatdan kechikmasdan amalga oshiramiz”, – dedi u.
Ma’lum bo‘lishicha, respublika miqyosidagi 14 ta hudud aholisi bo‘yicha minimal iste’mol xarajatlari qiymatini e’lon qilishning 2023 yil uchun muddati Vazirlar Mahkamasining 2023 yil 27 fevralda qabul qilingan “2023 yil uchun statistika dasturini tasdiqlash to‘g‘risida”gi qarorida belgilangan.
Bu qarorga asosan, kambag‘allik darajasi ham iyul oyida e’lon qilinishi ko‘zda tutilgan.
Aholi turmush darajasi va kuzatuvlari statistikasi boshqarmasi boshlig‘i o‘rinbosari Rahmatjon O‘rozboyevning so‘zlariga ko‘ra, 2021 yilda butun respublika bo‘yicha 10 000 uy xo‘jaligi o‘rtasida kuzatuvlar o‘tkazilgan bo‘lsa, joriy yilda 14 mingda xo‘jalikda kuzatuvlar amalga oshirilgan.
“O‘tgan yili kuzatuvlar natijasida 80 dan ortiq oziq-ovqat va 100 dan ortiq xizmatlarning statistika ma’lumotlari yig‘ilgandi.
2022 yilgi statistika dasturiga asosan Jahon banki, XVJ ekspertlari taklifiga binoan 14 mingdan ortiq uy xo‘jaligi o‘rtasida so‘rov o‘tkazildi. Bunda oziq-ovqatlar soni 159 taga, nooziq-ovqatlar va xizmatlar 413 taga yetkazildi. Hozirgi kunda hisob-kitoblar amalga oshirib bo‘lindi”, – dedi u.
Mas’ullarning qo‘shimcha qilishicha, ma’lumotlarni avvalgi yillarga solishtirish jarayoni biroz vaqt oladi. Shu sababli bu yil kambag‘allik chegarasini e’lon qilish iyulga belgilangan.
