«Roma» hujumchisi Eldor Shomurodov yangi mavsumni Italiyaning boshqa klubida boshlashi mumkin.
«RomaPress» xabariga ko‘ra, O‘zbekiston milliy jamoasi hujumchisiga «Lechche» klubi qiziqish bildirmoqda. O‘tgan mavsum A Seriyada 16-o‘rinni egallagan lechcheliklar yangi mavsum oldidan hujum chizig‘ini Shomurodov bilan kuchaytirmoqchi. O‘tish transfer orqali amalga oshadimi yoki ijara – hozircha noma’lum.
La Gazzetta dello Sport nashrining yozishicha, Shomurodov Joze Mourinoning yangi mavsum uchun rejalaridan o‘rin olmagan. Rim klubi Eldor uchun takliflarni ko‘rib chiqishga tayyor. Eldorning rimliklar bilan amaldagi kelishuvi 2026 yilga qadar imzolangan.
Eslatib o‘tamiz, Shomurodov o‘tgan mavsumning ikkinchi qismini ijara asosida «Spetsiya»da o‘tkazib, bu jamoani A Seriyadagi o‘rnini saqlab qolishga yordam bera olmadi. U 16 o‘yinda bitta gol va 2ta assistga mualliflik qildi.
