Reuters: Vashington 25 iyul kuni Kiyevga yangi harbiy yordam to‘g‘risida e’lon qilmoqchi

Reuters agentligining AQSh uch rasmiy vakiliga tayanib xabar berishicha, Ukrainaga artilleriya qurollari, havo hujumidan mudofaa tizimlari uchun raketalar va quruqlikdagi harbiy texnika yetkazib berish rejalashtirilgan. 

Xususan, gap Stryker zirhli transportyorlari, NASAMS, Patriot, Stinger zenit-raketa komplekslari hamda HIMARS tizimlari uchun o‘q-dorilar haqida ketmoqda. 

Bundan oldin AQSh Ukrainaga yangi harbiy yordam paketini taqdim etishini e’lon qilgandi, uning umumiy hajmi 1,3 milliard dollarni tashkil etadi. 

Yordam paketi to‘rtta NASAMS zenit-raketa tizimlari va ularga o‘q-dorilar, 152 millimetrli artilleriya snaryadlari, TOW tankka qarshi raketalar, yuqori aniqlikdagi aviatsiya o‘q-dorilari, Phoenix Ghost va Switchblade uchuvchisiz uchish apparatlari, shuningdek, dronlar va elektron urushlarga qarshi vositalarni o‘z ichiga oladi, deya xabar berdi Amerika Mudofaa vazirligi.

Bundan tashqari, Qo‘shma Shtatlar Ukraina uchun 150ta yonilg‘i quyish qurilmasi, 115ta texnikani tortish va tashish uchun taktik mashina, texnikani evakuatsiya qilish uchun 50ta taktik mashina, portlar va bandargohlarni himoya qilish va minalardan tozalash uchun uskunalar, shuningdek, taktik xavfsiz aloqa tizimlarini sotib oladi.