Kiyev Belarus Qizil Xoch tashkilotini Ukrainadan bolalarni noqonuniy olib chiqishda aybladi

Uning so‘zlariga ko‘ra, Belarus Qizil Xoch tashkiloti o‘z harakatlari bilan «Jyeneva konvensiyalari normalarini, shuningdek, Qizil Xoch harakatining asosiy tamoyillarini qo‘pol ravishda buzmoqda». 

Kostin Xalqaro Qizil Xoch Qo‘mitasini vaziyatga e’tibor qaratishga va «tegishli choralar ko‘rishga» chaqirdi.

Ukrainaning Rossiya tomonidan anneksiya qilingan hududlaridan bolalar Belarusdagi sog‘lomlashtirish lagerlariga «ta’tilga» jo‘natilyapti, biroq hammasi ham ortga qaytmayapti, ba’zilari Rossiya hududida g‘oyib bo‘lyapti, deya xabar berdi muxolifatdagi Inqirozga qarshi xalq boshqaruvi rahbari va Belarusning o‘tish davri qo‘shma vazirlar mahkamasi vakili Pavel Latushko 19 iyul kuni «Dojd» telekanaliga bergan intervyusida.

Anneksiya qilingan hududlarning Rossiya tomonidan tayinlangan «hokimiyatlari» mehribonlik uylaridagi yetim bolalar reabilitatsiya qilish uchun Belarusga olib ketilayotganini da’vo qilmoqda. Iyun oyida Rossiya va Belarus ittifoq davlati kotibi Dmitriy Mezensev qo‘shib olingan «DXR» va «LXR»dan 2000dan ortiq bolalar ota-onalari yoki vasiylarining roziligi bilan Minsk viloyatidagi sanatoriyga dam olishga ketganini aytdi.

18 iyul kuni Yevroparlament deputatlari Belarus rahbari Aleksandr Lukashenkoni hibsga olishga order berish talabi bilan Haagadagi Xalqaro jinoiy sudga (XJS) murojaat qildi. Yevroparlamentning xalqaro ishlar bo‘yicha qo‘mitasi tomonidan qabul qilingan hujjatda Ukrainaga yetkazilgan zarar va uning hududida sodir etilgan jinoyatlar uchun Belarus mas’ul ekani aytiladi. Bundan tashqari, Yevroparlament deputatlari ukrainalik bolalarni noqonuniy deportatsiya qilishda Lukashenko rejimining roliga ishora qilgan.