Neymarning bahosi ma’lum qilindi, Iniyesta esa Messining oldiga bormadi. So‘nggi transfer xabarlari
|21:18 / 09.08.202327 68010 min
«Arsenal» yangi darvozabon olmoqda.
Yozgi transferlar davom etmoqda, yana bir qator futbolchilar o‘zlariga yangi klub topishdi, yana bir qancha transferlar hal bo‘lishi kutilmoqda. Quyida so‘nggi kunlarning eng asosiy transfer xabarlari dayjesti.
Andres Iniyesta faoliyatini BAA chempionatida davom ettiradi
Uni Leo Messi bilan yana bir jamoada ko‘rish umidi amalga oshmadi. Kamida shu yozda. Yaponiyaning «Vissel Kobe» klubini tark etgan 39 yoshli yarimhimoyachi kutilganidek «Inter Mayami»ga emas, BAAning «Emireyts» klubiga o‘tdi. Afsonaviy futbolchi bilan 2024 yil yoziga qadar shartnoma imzolangan.
«Tottenhem» bir kunda ikki transferni e’lon qildi
APL chempionatida yangi legionerlar. Birinchisi — niderlandiyalik 22 yoshli himoyachi Mikki van de Ven. «Volfsburg» uning uchun 40 mln yevroga ega bo‘ldi, futbolchining o‘zi bilan 2029 yilga qadar shartnoma tuzildi va unga 37-raqam berildi.
Ikkinchisi — argentinalik 19 yoshli hujumchi Alexo Velis. «Rosario Sentral» hisobiga bonuslardan tashqari 15 mln yevro borib tushdi. Iste’dodli futbolchi bilan olti yillik shartoma imzolangan, u 36-raqam ostida o‘ynaydi.
«Nyukasl»ning yana bir yirik transferi
Gap 20 yoshli o‘ng qanot himoyachisi Valentino Livramento haqida bormoqda. Ushbu yigitchani chempionshipga tushib ketgan «Sauthempton»dan 37,2 mln yevro evaziga xarid qilishdi. «Avliyolar» yaxshigina foyda ko‘rishdi, chunki ikki yil oldin Tino uchun olti barobar kamroq to‘langandi. Shartnoma 2028 yilga qalar tuzilgan.
«Latsio» Daniya chempionatining eng yaxshi to‘purarini xarid qildi
Rimliklar chempionlar ligasi uchun tarkibni kuchaytirmoqda. Sarri jamoasi 22 yoshli vinger Gustav Isaksenni o‘z safiga qo‘shib oldi. U o‘tgan mavsumda Daniya chempionatida 18 gol urib, eng yaxshi to‘purarga aylangandi, endi esa «Midtyullann» xazinasiga 12 mln yevro keltirdi. Isaksen va «Latsio» o‘rtasidagi shartnoma besh yilga mo‘ljallangan.
Mavzuga oid
Neymar Saudiya Arabistoniga yo‘l olishi mumkin
Neymar «PSJ»ni tark etishi bilan bog‘liq yangi tafsilotlar paydo bo‘lmoqda. L`Equipe shu kunlarda 31 yoshli braziliyalik parijliklar klubi rahbariyatini ketish istagi haqida xabardor qilganini yozgandi. Futbolchining otasi buni rad etganiga qaramay, mediada boshqa ma’lumotlar paydo bo‘lmoqda — xususan, Saudiya Arabistonidan bo‘layotgan qiziqish haqida.
Aniq bir klub nomi keltirilmayapti, ammo Barca Universal portaliga ko‘ra, saudiyaliklar Neymarni yiliga 300-400 million yevrolik maosh bilan chaqirishmoqchi. Diario Sport esa undan ham hayratlanarli versiyani e’lon qildi: braziliyalik hujumchi Saudiya Arabistoni klubiga o‘tgach, u yerdan «Barselona»ga ijaraga beriladi.
Kataloniyaliklar uni to‘g‘ridan to‘g‘ri transfer qila olmasligi aniq. Sky Sport ma’lumotiga ko‘ra, «PSJ» futbolchini transferga qo‘ygan va uning sotuvidan kamida 58 mln yevro ishlab olishni istaydi. Shu bilan birga, narx turli klublar uchun turlicha bo‘ladi, kim uchundir narx 95 million yevrogacha yetishi mumkin. «Barselona»da esa na unisi, na bunisi topiladi.
«Bavariya» Keyn bo‘yicha taklifni yaxshiladi
«Bavariya» Harri Keyn transferi bo‘yicha «Tottenhem»ga yangi taklif yuborgan. Sky Spors ma’lumotiga ko‘ra, myunxenliklar «shporlar»ga 94,6 million funt sterling (120 million yevro atrofida) to‘lashga tayyor. «Bavariya» transferni yaqin kunlar ichida amalga oshirmoqchi.
Avvalroq jurnalist Mettyu Lou Keyn myunxenliklar klubi rahbariyati uchun dedlayn belgilaganini xabar qilgandi.
O‘z navbatida, Evening Standard ma’lumotiga ko‘ra, «Tottenhem» «Bavariya»ning o‘tgan haftada yuborgan 100 mln yevrolik taklifini ham rad etganidan keyin, Keyn vaziyatni qayta ko‘rib chiqqan va fikrini o‘zgartirgan: u endi London klubida qolishi mumkin. Go‘yoki 30 yoshli angliyalik hujumchiga jamoaning yangi bosh murabbiyi Angelos Postekogluning o‘yin falsafasi ma’qul kelgan.
2022/23 yillar mavsumida Keyn londonliklar safida 49 o‘yinda maydonga tushib, 32 gol urdi va 5 golga uzatma berdi. Forvardning klub bilan shartnomasi keyingi yil yozida yakunlanadi.
«Arsenal» «Bavariya» istagan darvozabonni o‘ziniki qilmoqda
David Rayya «Brentford»ni tark etib, Angliya vitse-chempioni safiga o‘tadi. Fabritsio Romanoning yozishicha, 27 yoshli ispaniyalik darvozabon transferi to‘liq hal qilingan, transfer uchun 30 mln funt to‘laydi, futbolchining o‘zi esa 2028 yilga qadar amal qiluvchi shartnomaga ega bo‘ladi. Tibbiy ko‘rik keyingi haftaga mo‘ljallangan, shunday ekan, rasmiy taqdimot ham keyinroq bo‘lib o‘tadi.
Bu vaqtda «Arsenal» ikkinchi darvozaboni Matt Ternerni 10 mln funt evaziga «Nottinghem Forest» klubiga pulladi. Amerikalik darvozabon yangi klubi bilan to‘rt yillik shartnoma imzolagan.
«Chelsi» Vlahovich transferini istamoqda
ESPN xabariga ko‘ra, shu yozda 60 mln yevroga xarid qilingan hujumchi Kristofer Nkunku «Borussiya» klubi bilan o‘rtoqlik uchrashuvida jarohat olib, to‘rt oyga safdan chiqqach, «Chelsi» hujum chizig‘iga Vlahovichni olib kelishga qaror qilgan. «Yuventus»ning 23 yoshli hujumchisi — londonliklarning asosiy nishoniga aylandi. Transfermarkt serbiyalik forvard transferini 80 million yevroga baholagan.
Ammo turinliklar ushbu futbolchisini Romelu Lukakuga almashishga ham tayyor bo‘ladi, bu holda londonliklar belgiyalik hujumchi ustiga ma’lum miqdorda pul qo‘shib berishi kerak.
Vlahovich o‘tgan mavsumda «Yuventus» A seriyaning 27 o‘yinida qatnashib, 10 gol urgan.
«Chelsi» yosh braziliyalik uchun 15 mln yevro to‘lamoqchi
Bu klubda transferlar uchun pul tugamayapti. Fabritsio Romanoning yozishicha, «Chelsi» yaqin kunlar ichida «Santos»ning 18 yoshli hujumchisi Deyvid Vashingtonni o‘z safiga qo‘shib oladi. Transfer summasi — 15 mln yevro, yana 5 mln yevro bonuslar ko‘rinishida to‘lanishi mumkin. Futbolchining o‘zi bilan ko‘p yillik shartnoma bo‘yicha kelishuvga erishilgan. Yagona intriga: Vashington yangi mavsumda qayerda o‘ynashi bilan bog‘liq. U «Strasburg»ga ijaraga berilishi varianti istisno etilmayapti, Fransiyaning ushbu klubi ham «Chelsi»ning hozirgi xo‘jayini Todd Bouliga tegishli hisoblanadi.
«MYu» «Vest Hem»dan ikki futbolchisi bo‘yicha taklif oldi
The Athletic nashri ma’lumotiga ko‘ra, londonliklar klubi 30 yoshli himoyachi Harri Maguayr va 26 yoshli yarimhimoyachi Skott Maktomineyni safiga qo‘shib olish va bu futbolchilar transferi uchun 69,6 mln yevro to‘lashga rozi. Hozircha «MYu» ushbu ikkitalik taklifga qanday yondashishi aniq emas, ammo bu taklif oldinroq rad etilganidan ancha yaxshiroq. Bu klub Maguayr uchun ma’lum miqdorda mablag‘ ishlab olishiga so‘nggi imkoniyat bo‘lishi ham mumkin.
Verratti bo‘yicha savdolashuv davom etmoqda
«PSJ»ning faxriy futbolchilaridan biri Marko Verratti ham fransuz klubini tark etishga yaqin. «Al-Ahli» 30 yoshli italiyalikni transfer qilish harakatlarini to‘xtatmayapti va insayder Fabritsio Romanoga ko‘ra, o‘zining oldingi taklifini yaxshilagan — 30 million yevrodan 45 million yevroga. Lekin «PSJ»dagilar bu borada qaror qilishga shoshilishmayapti — jamoa bosh murabbiyi Luis Enrike Verrattini yangi mavsum uchun rejalariga kiritgan va uni qo‘yib yuborishga rozi bo‘lmayapti.
«Bavariya» Kayl Uoker transferini amalga oshira olmadi
Bu transfer yaqin vaqtlar ichida e’lon qilinadigandek ko‘rinayotgandi, ammo amalda bunday bo‘lib chiqmadi. Florian Plettenbergning yozishicha, «Manchester Siti»ning 33 yoshli himoyachisi bu yozda «Bavariya»ga o‘tmaydi. Avvaliga futbolchi tomonidan transferga rozilik bildirilganiga qaramay, muzokaralar to‘xtab qoldi. The Athletic xabariga ko‘ra endi Uoker qarorini o‘zgartirgan va APLda qoladigan bo‘lgan. Qolaversa, «Siti» unga yangi shartnoma taklif qilishi kutilmoqda.
