Toshkent aeroporti elektr ta’minotida qisqa muddatli uzilish kuzatildi

Shahar podstansiyasida ro‘y bergan avariya Toshkent aeroportida elektr ta’minotida qisqa muddatli uzilishga olib keldi.

Foto: Kun.uz

Toshkent xalqaro aeroportida kecha, 27 avgust kuni soat 22:09 da Qo‘yliq shahar podstansiyasida ro‘y bergan avariya tufayli elektr ta’minotida uzilish yuz berdi.

Bir necha soniya ichida zaxira manbalardan parvozlarni ta’minlovchi obektlar: uchish-qo‘nish yo‘laklari, havo harakatini boshqarish tizimlari, radionavigatsiya uskunalari quvvati tiklangan. Shu tufayli poytaxt aeroportida reyslar kechiktirilmadi.

Mahalliy aviaqatnovlar va uchib kelish terminallari zaxira manbalariga o‘tkazilgan. 15 daqiqa ichida, soat 22:24 da xalqaro aviaqatnovlar terminalining jo‘nab ketish zalida ham elektr ta’minoti tiklangan.

Soat 22:40 da Qo‘yliq shahar podstansiyasida yuz bergan avariya bartaraf etilib, poytaxt aeroportida elektr ta’minoti to‘liq tiklangan.

#aeroport #elektr