Belgiyada Markaziy Osiyo davlatlari elchilari Federika Mogerini bilan uchrashdi

Joriy yil 22 sentabr kuni Belgiyaning Bryugge shahridagi Yevropa kollejida Markaziy Osiyo davlatlari elchilari Yevropaning yetakchi diplomatiya akademiyasi rektori, Yevropa Ittifoqining 2014-2019 yillardagi tashqi ishlar va xavfsizlik siyosati bo‘yicha sobiq oliy vakili Federika Mogerini hamda Diplomatiya akademiyasi tinglovchilari bilan uchrashdi, deb xabar qilmoqda «Dunyo».

Yevropa Ittifoqining turli davlatlaridan kelgan diplomatlar bilan suhbat mavzusi Markaziy Osiyo mamlakatlari va Yevropa Ittifoqi o‘rtasidagi munosabatlarni rivojlantirishga bag‘ishlandi. Uchrashuvda Markaziy Osiyo mamlakatlari – O‘zbekiston, Qozog‘iston, Qirg‘iziston, Turkmaniston va Tojikiston elchixonasi vakillari hozir bo‘ldi.

Tadbirdan ko‘zlangan maqsad yevropalik yosh diplomatlarni Yevropa Ittifoqining tashqi siyosiy faoliyatidagi ustuvor yo‘nalishlar bilan tanishtirish, ularning mintaqaga bo‘lgan qiziqishini qo‘llab-quvvatlash hamda Markaziy Osiyo mamlakatlari va Yevropa diplomatiya muassasalari o‘rtasida o‘zaro tushunishni chuqurlashtirish uchun bevosita aloqalarni rivojlantirish bilan izohlanadi.

Uchrashuv ishtirokchilariga murojaat qilar ekan, rektor Federika Mogerini Markaziy Osiyo Yevropa Ittifoqi uchun tobora muhim mintaqaga aylanib borayotganini ta’kidladi. 

Muloqot chog‘ida Yevropa Ittifoqi-Markaziy Osiyo munosabatlaridagi ijobiy tamoyillar, mintaqa barqarorligi va farovonligini mustahkamlashga qaratilgan qo‘shma tashabbuslarga ham alohida e’tibor qaratildi.