Shvetsiyaning IKEA kompaniyasi Belgiyadagi oʻta oʻng «Flamand manfaati» (Vlaams Belang) partiyasiga qarshi sud nizosida oraliq gʻalabaga erishdi. Nizoga partiyaning migratsiyani qisqartirishga qaratilgan siyosiy rejasida IKEA tovar belgisidan foydalangani sabab boʻlgan.

8-sentabr kuni Lyuksemburgdagi Yevropa Ittifoqi sudi mazkur masala yuzasidan IKEA pozitsiyasini qoʻllab-quvvatladi.

Sud fikricha, boshpana va migratsiya siyosatiga oid siyosiy reja nomida IKEA kabi obroʻga ega tovar belgisidan foydalanish kompaniya brendi nufuziga zarar yetkazishi va uning qonuniy manfaatlariga zid kelishi mumkin.

Sud talqiniga koʻra, obroʻga ega tovar belgisi egasi siyosiy partiya tomonidan ushbu belgidan foydalanilishiga qarshi chiqish huquqiga ega. Bunda siyosiy partiya oʻz fikrini erkin ifoda etish huquqi tovar belgisi egasining huquq va manfaatlaridan ustun ekanini asoslab berishi lozim.

«IKEA rejasi» nima?

Nizo 2022-yilda boshlangan. Oʻshanda «Flamand manfaati» partiyasi Belgiyaning migratsiya qonunchiligini isloh qilish boʻyicha oʻz dasturini «IKEA rejasi» deb atagan.

Partiya hatto siyosiy rejasini IKEA mebellarini yigʻish boʻyicha mashhur yoʻriqnomalar uslubida bezagan.

Biroq bu holatda IKEA soʻzi kompaniya nomi sifatida emas, balki niderland tilidagi Immigratie Kan Echt Anders iborasining qisqartmasi sifatida ishlatilgan. Uni mazmunan «Immigratsiya haqiqatan ham boshqacha boʻlishi mumkin» deb tarjima qilish mumkin.

Shundan soʻng IKEA oʻz tovar belgisidan siyosiy kampaniyada foydalanilganiga qarshi sudga murojaat qilgan.

«Flamand manfaati» esa IKEA brendining keng tanilganidan oʻz siyosiy gʻoyalariga eʼtibor jalb qilish va ularning taʼsirini kuchaytirish maqsadida foydalanganini yashirmagan. Partiya bu harakatini fikrni erkin ifoda etish huquqi bilan asoslagan.

Ikki fundamental huquq oʻrtasidagi nizo

Ishni koʻrib chiqayotgan Belgiya sudi mazkur vaziyatda ikki asosiy huquq - mulk huquqi hamda fikrni erkin ifoda etish huquqi oʻrtasida ziddiyat mavjud degan xulosaga kelgan.

Shu sababli Belgiya sudi Yevropa Ittifoqi sudidan masala boʻyicha huquqiy talqin berishni soʻragan.