AQSh Kongressi Vakillar palatasi Ukrainaga yordamni nazarda tutmaydigan budjet loyihasini ma’qulladi

AQSh Kongressining Vakillar palatasi hukumatning Ukrainaga pul ajratishni nazarda tutmaydigan 45 kunlik moliyalashtirish loyihasini ma’qulladi. Bu haqda Vakillar palatasi a’zosi, respublikachi Patrik MakHenri so‘zlariga tayanib, Washington Post (WP) xabar berdi.

Hujjat Senat tomonidan tasdiqlanganidan keyin kuchga kiradi. Agar parlamentariylar 1 oktyabr yarim tungacha (Toshkent vaqti bilan 9:00) kelishuvga erisha olmasa, AQSh hukumati ishi qisman to‘xtatiladi.

Vakillar palatasining 335 a’zosi moliyalashtirish loyihasini yoqlab, 209 nafari qarshi ovoz bergan. Tasdiqlangan loyiha, xususan, tabiiy ofat oqibatlarini bartaraf etish, suv toshqinidan sug‘urta qilish federal dasturi va Federal fuqarolik aviatsiya boshqarmasi (FAA) faoliyatini qayta tiklashga sarflanadigan mablag‘larni o‘z ichiga oladi.

30 sentabr kuni erta tongda respublikachi Tom Koul vakillar palatasiga Ukrainaga yordamni nazarda tutmaydigan, hukumatni moliyalashtirish to‘g‘risidagi 45 kunlik qonun loyihasi kiritilganini ma’lum qildi.

Vakillar palatasidan farqli o‘laroq demokratlar ko‘pchiligiga ega bo‘lgan Senat Ukrainaga 6,15 milliard dollar yordam ko‘rsatishni o‘z ichiga oladigan hukumatni moliyalashtirish rezolyutsiyasini ko‘rib chiqmoqda. Yuqori palatadagi ozchiliklar yetakchisi Mitch MakKonnellning aytishicha, Senatdagi respublikachilar demokratlar tashabbusiga to‘sqinlik qiladi.

Oq uy va respublikachilar hukumat ishining ehtimoliy to‘xtab qolishida bir-birini ayblamoqda. AQSh prezidenti Jozef Baydenning fikricha, uning oqibatlari mamlakat uchun halokatli bo‘lishi mumkin. Ukrainaga yordam ko‘rsatish - tomonlar kelishuvga erisha olmayotgan bahsli mavzulardan biri. Oq uy ushbu maqsadlar uchun 24 milliard dollar ajratishni taklif qilmoqda.