Ko‘rsatilgan xizmatlar bo‘yicha turoperatorlarga QQSning bir qismi qaytariladi 

“Ko‘rsatilgan xizmatlar bo‘yicha turoperatorlarga qo‘shilgan qiymat solig‘ining bir qismini qaytarish tartibi to‘g‘risidagi vaqtinchalik nizomni tasdiqlash haqida”gi hukumat qarori loyihasi e’lon qilindi.

2023 yil 1 maydan boshlab 2024 yil 1 iyulga qadar tajriba tariqasida turoperator xizmatlarini ko‘rsatuvchi tadbirkorlik sub’yektlariga ular tomonidan 5 nafar va undan ortiq norezidentlarga xizmatlar ko‘rsatishni nazarda tutuvchi turpaketlar (joylashtirish, avtomobil yoki temir yo‘l transporti, ekskursiya va ovqatlanish bo‘yicha xizmatlar qamrab olingan) bo‘yicha chet ellik hamkorlariga taqdim etilgan hisobvaraq-fakturada ko‘rsatilgan qo‘shilgan qiymat solig‘ining 20 foiz miqdoridagi mablag‘lar respublika budjetidan subsidiya sifatida qaytariladi.

Quyidagilarni nazarda tutuvchi ko‘rsatilgan xizmatlar bo‘yicha turoperatorlarga qo‘shilgan qiymat solig‘ining bir qismini qaytarish tartibi to‘g‘risidagi vaqtinchalik nizom tasdiqlanadi:

• ko‘rsatilgan xizmatlar bo‘yicha qo‘shilgan qiymat solig‘ining bir qismini turoperatorlarga qaytarish tartibi;
• ko‘rsatilgan xizmatlar bo‘yicha turoperatorlarga qo‘shilgan qiymat solig‘ining bir qismini qaytarish yoki qaytarishni rad etish uchun asoslar;
• ko‘rsatilgan xizmatlar bo‘yicha turoperatorlarga qo‘shilgan qiymat solig‘ining bir qismini qaytarishda soliq organlari va g‘aznachilik organlarining o‘zaro hamkorligi tartibi.

Belgilanishicha, turoperatorlarga ko‘rsatilgan xizmatlar uchun xizmatlar ko‘rsatilganligini tasdiqlovchi hujjatlar asosida qo‘shilgan qiymat solig‘ining 20 foizini qaytarish xizmatlar ko‘rsatilgan oydan keyingi oyning yigirma beshinchi kunidan keyin amalga oshiriladi.