Qatar poytaxti Doha shahrida Osiyo futbol konfederatsiyasining «AFC Annual Awards» yilning eng yaxshilarini taqdirlash marosimi bo‘lib o‘tdi.
O‘zbekiston futbol assotsiatsiyasi «Yilning eng yaxshi futbol federatsiyasi» nominatsiyasida g‘oliblikni qo‘lga kiritdi. Sovrinni O‘FA birinchi vitse-prezidenti Ravshan Ermatov qabul qilib oldi.
«Qayd etish joiz, o‘tgan davr mobaynida O‘zbekiston Osiyoning turli futbol tadbirlariga mezbonlik qildi hamda o‘zaro loyihalarni amalga oshirdi. Xususan, tarixda ilk bor U-23 va U-20 Osiyo chempionatlari, shuningdek, OFKga a’zo assotsiatsiyalar prezidentlari va bosh kotiblari konferensiyasi mamlakatimizda o‘tkazildi.
Qit’a miqiyosidagi turli saralash bahslari, klublar o‘rtasidagi turnirlar, ayollar futboli, CAFA musobaqalarida O‘FA faollik ko‘rsatdi. Ushbu sa’y-harakatlar OFK tomonidan munosib e’tirof etildi», - deyiladi O‘FA xabarida.
Mazkur nominatsiyada O‘zbekistondan tashqari, Eron va Yaponiya futbol assotsiatsiyalari ham da’vogar sanalardi.
Shuningdek, Markaziy Osiyo futbol assotsiatsiyasi – CAFA yilning eng yaxshi mintaqaviy assotsiatsiyasi deb topildi.
