British Management University (BMU) yangi kampusining tantanali ochilishiga bag‘ishlangan katta tadbir bo‘lib o‘tdi. Yangi kampusning manzili – Toshkentning Mirzo Ulug‘bek tumani, Mirzo Bobur ko‘chasi, 35.
Tantanali ochilish marosimiga faxriy mehmonlar qatorida O‘zbekiston Respublikasi Prezidenti administratsiyasining departament rahbari Odil Abdurahmonov, Buyuk Britaniya Lordlar palatasi vakili lord Veyverli va O‘zbekistondagi Britaniya kengashi direktori miss Denis Vadinxam tashrif buyurdi. Shuningdek, tadbirda Buyuk britaniyalik hamkor OTM: University of Reading va Queen Margaret University vakillari, University of Cambridge o‘qituvchilari, BMU rahbariyati, o‘qituvchilari va talabalari, mashhur blogerlar va inflyuenserlar qatnashdi.
BMUʼga kelgan mehmonlar dastlab kampus bo‘ylab ekskursiyaga taklif etildi, uning o‘ta zamonaviy infratuzilmasi va jihozlanishi mehmonlarda chuqur taassurot qoldirdi. Ekskursiyadan keyin ochilish marosimining rasmiy qismi boshlandi, unda faxriy mehmonlarning qutlov so‘zlari, iftixorga to‘la mulohazalar va ezgu tilaklar yangradi. Chiqishlar yakunlanganidan keyin faxriy mehmonlar ramziy tugmani bosish orqali kampus ishiga start berdi. BMU yangi kampusining tantanali ochilishi amalga oshdi!
Marosim doirasida universitet rahbariyati namunali akademik o‘zlashtirishga ega talabalarni va jamoatchi-faollarni qimmatbaho sovg‘alar bilan taqdirladi. Tantanali marosimni raqs jamoalari va o‘zbek estradasi san’atkorlari ishtirokidagi ajoyib ko‘ngilochar dastur yakunladi.
BMU rektori Konrad Ozog: “Yangi kampusning qurilishi talabgir ixtisosliklar bo‘yicha qulay ta’lim olish va o‘z sohalarida haqiqiy yetakchi bo‘ladigan bilimdon rahbarlarni tarbiyalash uchun barcha sharoitlarni yaratish imkonini berdi. Toshkentdagi Britaniya Menejment universiteti ulkan rejalarga ega va yangi kampusda biz ularning birortasini qoldirmay amalga oshirishni hamda yosh iqtidorlarga jahon standartlariga muvofiq oliy ta’limga ega bo‘lish, muvaffaqiyatli ishga joylashish hamda O‘zbekiston Respublikasi iqtisodiyoti foydasiga ishlash imkoniyatini taqdim etishni rejalashtirganmiz”.
Universitetning yangi hududi
British Management University – O‘zbekistondagi jahon miqyosidagi universitet Toshkentda 2020 yil 8 mayda tashkil topgan. Dastlab mashg‘ulotlar poytaxt markazidagi kichik kampusda o‘tkazilgan. Ikki yildan oz muddatda, eng yaxshi mutaxassislar qatnashishi, ilg‘or maxsus texnikadan va materiallardan foydalanish evaziga umumiy maydoni 44 000 m2ga teng zamonaviy eko-kampusni qurish loyihasi amalga oshirildi. 5 gektar maydonda o‘quv va ma’muriy korpuslar, yotoqxona, sport bilan shug‘ullanish va ochiq havoda dam olish infratuzilmalari, kafe, kitob do‘koni va kovorking-hududlar joy oldi. Bundan tashqari, BMUʼning yangi kampusida imkoniyatlari cheklangan insonlar uchun barcha sharoitlar yaratilgan.
