Farg‘onadagi xonadondan 79,2 ming dona pirotexnika vositalari topildi

Farg‘ona viloyatida xonadonida 79,2 ming dona pirotexnika vositalari saqlab kelgan shaxs aniqlandi, deb xabar beradi viloyat IIB axborot xizmati.

Ma’lum qilinishicha, Farg‘ona tumani IIB xodimlari tomonidan olib borilgan profilaktik tadbirlar davomida «Vodil» MFYda yashovchi Sh.I.ning yashash xonadoni xolislar ishtirokida ko‘zdan kechirilgan. Natijada, fuqaroning yashash xonadoni hovlisida chegaraning zaif hududlari orqali Qirg‘izistondan o‘tkazilgan, taxminiy narxi 14,4 million so‘m bo‘lgan 79,2 ming dona «Treniya» nomli pirotexnika vositalarini o‘tkazish maqsadida saqlab kelayotgani aniqlangan.

Holat yuzasidan Sh.I.ga nisbatan Ma’muriy javobgarlik to‘g‘risidagi kodeksning 185-1-moddasi (pirotexnika buyumlarining qonunga xilof muomalasi) bilan ma’muriy javobgarlikka tortish chorasi ko‘rilgan.