Sudoche rasman xalqaro ahamiyatga ega bo‘lgan suv-botqoq yerlari nominatsiyasiga kiritildi

O‘zbekiston avvalroq Qoraqalpog‘iston Respublikasida joylashgan Sudoche ko‘llar tizimini xalqaro ahamiyatga ega bo‘lgan suv-botqoq hududi deb e’lon qilgandi. Bugungi kunda chegaralari aniqlangan ko‘llar Ramsar konvensiyasining 2.1-moddasiga muvofiq rasmiy ravishda Xalqaro ahamiyatga ega bo‘lgan suv-botqoq yerlar ro‘yxatiga kiritilgan.

Ayni paytda respublikadagi xalqaro ahamiyatga ega bo‘lgan suv-botqoq yerlarning umumiy soni to‘rttaga yetdi va bu hududlarning maydoni bugungi kunda 674,4 ming gektarni tashkil etadi.

Konvensiya kotibiyati xabarida ro‘yxatga yangi obekt kiritilishi O‘zbekistonning dunyodagi eng muhim suv-botqoq yerlarini saqlash va ulardan barqaror foydalanishga qaratilgan Ramsar konvensiyasini amalga oshirishga sodiqligini ko‘rsatishi alohida ta’kidlangan.

Ma’lumot uchun, Sudoche 1960-yillarda dunyodagi to‘rtinchi yirik ko‘l hisoblangan Orol dengizining kichik qismi bo‘lib, joriy yilning may oyida ko‘llar tizimi O‘zbekistondagi xalqaro ahamiyatga ega bo‘lgan Ramsar suv-botqoq yerlari ro‘yxatiga kiritilgan 4-obektga aylandi. Ro‘yxatga, shuningdek, Dengizko‘l ko‘li (2001), Arnasoy ko‘llar tizimi (2008), To‘dako‘l va Quyimozor suv omborlari (2020) kirgan.