Bosh prokuratura huzuridagi Departament xabariga koʻra, holatlar Gʻallaorol va Mirzachoʻl tuman boʻlimlari hamda boshqa huquqni muhofaza qiluvchi organlar hamkorligida oʻtkazilgan alohida tezkor tadbirlarda aniqlangan.
Birinchi holatda «Jizzax suv taʼminoti» AJ Jizzax shahar filiali inspektori Oʻ.A. fuqaro U.S.ning qurilishi tugallanmagan binosida suvdan noqonuniy foydalanilgani yuzasidan dalolatnoma rasmiylashtirmaslikni vaʼda qilgan.
Departament maʼlumotiga koʻra, inspektor buning evaziga 2 mln soʻm olgan vaqtida ashyoviy dalillar bilan ushlangan. Tezkor tadbirni Departamentning Gʻallaorol tumani boʻlimi hamkor idoralar bilan oʻtkazgan.
Ikkinchi holat Mirzachoʻl tumanida qayd etilgan. «Jizzax suv taʼminoti» AJning tuman filiali muhandisi A.X. fuqaro A.E.ning ichimlik suvidan noqonuniy foydalangani boʻyicha dalolatnoma rasmiylashtirmaslik va jarima yozmaslik evaziga pul olganlikda gumon qilinmoqda.
U 2,2 mln soʻmni olgan vaqtida ashyoviy dalillar bilan ushlangani bildirilgan.
Har ikki holat yuzasidan Jinoyat kodeksining tegishli moddalari bilan jinoyat ishlari qoʻzgʻatilgan. Hozirda tergov harakatlari olib borilmoqda.
