Ukrainada urushning 705-kuni o‘tdi. Asosiy ma’lumotlar:
- Ukrainalik bir qancha deputatlar va nashrlar Ukraina QK bosh qo‘mondoni Valeriy Zalujniyning iste’fosi haqida yozishdi. Ukraina mudofaa vazirligi bu xabarlarga raddiya berdi. Ukraina prezidenti Volodimir Zelenskiy kechki videomurojaatida Zalujniy haqida hech narsa demadi.
- Rossiya mudofaa vazirligi rossiyalik harbiylar Xarkiv oblastidagi Tabayevka qishlog‘i egallanganini ma’lum qildi. Ukraina QK buni rad etdi.
- Zelenskiy Germaniyadagi ARD telekanaliga bergan intervyusida ukrain armiyasida 880 ming kishi borligini ma’lum qildi va ko‘chada chaqiruv qog‘ozlari tarqatishni noto‘g‘ri chora deb atadi.
- Rossiya qo‘shini Ukrainaning Mikolayiv, Dnipropetrovsk, Xmelnitskaya va Rivne oblastlariga sakkizta dron hamda to‘rtta raketa bilan hujumlar uyushtirdi. Ukraina QK ma’lumotiga ko‘ra, dronlarning barchasi urib tushirilgan. Hujum oqibatlari yuzasidan ma’lumot yo‘q.
- FT nashri yozishicha, Yevroittifoq Ukrainani qo‘llab-quvvatlashdan bosh tortadigan bo‘lsa, Vengriya iqtisodiyotiga putur yetkazishga tayyor. Budapeshtdagilar esa bunday tahdiddan bexabarliklarini va Vengriya «bosimga bo‘ysunmasligi»ni bildirishgan.
- «Kommersant» nashri tasdiqlashicha, Rossiyaning uch regionida LTE interneti o‘chirilishi «dronlarga qarshi mudofaa tizimini sozlash» ishlari bilan bog‘liq.
- Yaroslavlda dron neftni qayta ishlovchi zavodga hujum qildi. Gubernator Vasiliy Golubev «shahar tashqarisidagi lagerda bir necha korpus devorlari hamda oynalari qisman shikastlangani»ni ma’lum qilgan. Uning ma’lumotiga ko‘ra, jabrlanganlar yo‘q.
Donetsk o‘qqa tutilishi
Ukraina qo‘shini 29 yanvar kuni Donetskni o‘qqa tutdi. Zarba okkupatsiya ostidagi shaharning sharqiy qismidagi Kalinin rayoniga berilgan. Moskva tomonidan tayinlangan mer Aleksey Kulemzinning xabariga ko‘ra, uch kishi halok bo‘lib, besh kishi yaralangan. Hujum vaqtida vrachlik dispanseri shikastlangan. Ukraina tomoni bu hujum yuzasidan izoh bermadi.
Alexander Ermochenko / Reuters / Scanpix / LETA
