U jami qariyb 20 yilga yaqin vaqt davomida Milliy teleradiokompaniyaga rahbarlik qildi.
Milliy teleradiokompaniya (MTRK) raisi Alisher Jo‘raqulovich Xo‘jayev lavozimidan ozod etildi.
Alisher Xo‘jayev 1963 yili Toshkent viloyatida tavallud topgan, 1985 yili Samarqand davlat universitetini tamomlagan.
U 1985–1993 yillarda O‘zbekiston Fanlar akademiyasi tizimidagi ilmiy-tekshirish institutlari, ishlab chiqarish birlashmalarida faoliyat olib borgan, 1993–1996 yillarda NKK firmasida tizim muhandisi bo‘lib ishlagan.
Alisher Xo‘jayev 1996 yildan rahbarlik lavozimlarida faoliyat yurita boshlagan. 1996 yildan 1998 yilga qadar «KomUzAziya» kompaniyasida, 1998–2001 yillarda esa UzPAK kompaniyasida bosh direktor lavozimida mehnat qilgan.
2001–2002 yillarda O‘zbekiston prezidenti huzuridagi Milliy xavfsizlik kengashi kotibi o‘rinbosari, 2002–2005 yillarda O‘zbekiston Aloqa va axborotlashtirish agentligi rahbari o‘rinbosari sifatida faoliyat ko‘rsatgan. Shundan keyin 2005 yil 15 aprelidan 2017 yil yanvariga qadar Milliy teleradiokompaniyaga rahbarlik qilgan, yil boshida tanqidga uchrab ishdan ketgan, lekin bir muddatlik tanaffusdan keyin, 2017 yil avgustida yana shu lavozimga qaytgandi.
Uning bu safargi ketishi tafsilotlari ma’lum emas.
