Bolaning boshi lat yegan, o‘zi emotsional qo‘rqish holatiga tushgan. Bolalar ombudsmani so‘roviga ko‘ra Toshkent shahar prokuraturasi mazkur holatga huquqiy baho berish masalasini o‘rganmoqda.
Ijtimoiy tarmoqlarda IIB xodimlari bir bolani mashinaga majburan tiqib olib ketishi aks etgan video tarqaldi. Videoda xodimlardan biri bolani ko‘tarib xizmat mashinasiga tiqayotganda bola boshini urib olib, baqirgani eshitiladi.
Bolalar ombudsmanining xabar berishicha, hodisa 2023 yil 22 dekabr kuni Toshkent shahrida sodir bo‘lgan. 2024 yil 1 fevral kuni bolaning onasi Bolalar ombudsmaniga murojaat qilgan.
Chilonzor tumani Chilonzor-3 mavzesida IIB xodimlari Sh.M. va A.O. 2011 yilda tug‘ilgan K.P. da pirotexnika vositalari borligini aniqlab, bolani xizmat mashinasiga kuch ishlatib, majburan o‘tqazishga uringan holda unga nisbatan qo‘pol va nomaqbul munosabatda bo‘lgan.
Buning oqibatida bola bosh sohasidan lat yegan va qattiq emotsional qo‘rqish holatiga tushgan.
IIB xodimlariga nisbatan mazkur holat yuzasidan xizmat tekshiruvi o‘tkazilib, Sh.M. va A.O.ning harakatlarida bolaga nisbatan qo‘pol munosabatda bo‘lish hamda IIV Kasb madaniyati kodeksini buzish holatlari yuzasidan hayfsan intizomiy jazosi qo‘llangan.
“Huquqni muhofaza qiluvchi organlar xodimlarining bola manfaatlariga zid bo‘lgan bu kabi harakatlariga mutlaqo yo‘l qo‘yib bo‘lmaydi va bunga javoban qonun doirasidagi qat’iy chora ko‘rilishi shart. Hozirda Bolalar ombudsmani so‘roviga ko‘ra Toshkent shahar prokuraturasi mazkur holatga huquqiy baho berish masalasini o‘rganmoqda”, deyiladi Bolalar ombudsmani xabarida.
