O‘zbekistonning tog‘li hududlarida qor ko‘chishi xavfi e’lon qilindi

«O‘zgidromet» agentligi 6-12 fevral kunlari O‘zbekistonning bir qator viloyatlarida qor ko‘chish xavfidan ogohlantirdi.

Agentlik ma’lumotiga ko‘ra, 2024 yil 7-8 fevral kunlari A-373 “Toshkent-O‘sh” avtomobil yo‘lining Qamchiq dovonidan o‘tgan qismida qor yog‘ishi, vaqti-vaqti bilan kuchli yog‘ingarchilik va tuman kuzatilishi, ko‘rinuvchanlik 50 metrgacha pasayishi, shamol tezligi 15-20 m/s gacha kuchayishi, oqibatda yo‘lda yaxmalak va qor uyumlari yuzaga kelishiga olib kelishi mumkin.

2024 yil 6-12 fevral kunlari kutilayotgan yog‘ingarchilik hamda havo haroratining o‘zgarishi sababli respublikaning tog‘li hududlarida, jumladan:

• Qashqadaryo viloyati: Dehqonobod, Kitob, Qamashi, Shahrisabz tumanlarida;
• Surxondaryo viloyati: Boysun, Qumqo‘rg‘on, Sariosiyo, Uzun tumanlarida;
• Samarqand viloyati: Bulung‘ur, Nurobod, Qo‘shrabot, Samarqand, Urgut tumanlarida;
• Jizzax viloyati: Baxmal, Zomin tumanlarida;
• Toshkent viloyati: Bo‘stonliq, Parkent, Ohangaron tumanlari (Chotqol tizmasi tog‘lari);
•  Namangan viloyati: Pop tumanida qor ko‘chish xavfi e’lon qilinadi.

“Tog‘li va tog‘oldi hududlarda istiqomat qiluvchi aholi, dam olish maskanlarida dam oluvchilar va ushbu hududlarda harakatlanuvchi haydovchilardan ehtiyotkorlik choralarini ko‘rishni so‘raymiz”, deyiladi xabarda.