O‘zbekistonning Qatardagi elchisi ish boshladi

Ashraf Xo‘jayev O‘zbekistonning Qatardagi birinchi elchisi etib tayinlandi. Bungacha u TIV Iqtisodiy diplomatiya departamenti direktori lavozimlarida ishlab kelgan.

Foto: Dunyo AA

Bugun 2024 yil 11 fevral kuni O‘zbekistonning yangi tayinlangan favqulodda va muxtor elchisi Ashraf Xo‘jayev Qatar poytaxtiga tashrif buyurgan. Bu haqda “Dunyo” axborot agentligi xabar bermoqda.

43 yoshli diplomat Toshkent davlat sharqshunoslik instituti, O‘zbekiston Milliy universiteti, Pekin universitetini tamomlagan. Iqtisodiyot fanlari nomzodi (PhD) ilmiy darajasiga ega.

A.Xo‘jayev TIV tizimidagi faoliyatini 2005 yilda referent sifatida boshlagan. O‘tgan yillar davomda u vazirlik markaziy apparatida, shuningdek, Nyu-York shahridagi O‘zbekistonning BMTdagi doimiy vakolatxonasida va Buyuk Britaniyadagi elchixonada turli lavozimlarda ishlagan.

2018 yildan TIV Iqtisodiy diplomatiya departamenti boshqarma, bosh boshqarma boshlig‘i va direktori lavozimlarida ishlab kelgan.

Ashraf Xodjayev O‘zbekistonning Qatardagi birinchi elchisi hisoblanadi. 2023 yil may oyida Toshkentda Qatar elchixonasi, 2023 yil dekabrda esa Dohada O‘zbekiston elchixonasi ochilgan edi.