Foto: Saida Mirziyoyeva Dohada dizayn biyennalesida ishtirok etmoqda

24 fevral kuni Madaniyat va san’atni rivojlantirish jamg‘armasi Qatarning Doha shahridagi dizayn biyennalesida «Hunarmand O‘zbekiston: tolalardagi an’ana» ko‘rgazma loyihasini taqdim etdi. Unda prezident yordamchisi Saida Mirziyoyeva ham ishtirok etdi.

Jamg‘arma matbuot xizmati «Gazeta.uz»ga ma’lum qilishicha, jamg‘arma biyennaleda ishtirok etishga O‘zbekistonning hunarmandchilik merosini namoyish etish uchun taklif qilingan. Ko‘rgazmaga tashrif buyuruvchilar yog‘och, ikat shoyisi va baxmal matosidan tayyorlangan buyumlarni tomosha qilishlari mumkin.

Ko‘rgazmada 49 ta qo‘l mehnati namunalari, jumladan, dizayner Nada Debs va o‘zbekistonlik usta Sirojiddin Rahmatillayev hamkorligidagi asarlar namoyish etilmoqda. O‘z hamkorliklarida ular tashrif buyuruvchilarga an’anaviy mebel unsurlarining zamonaviy talqinini taqdim etadi.

«Biz shu kunlarda Qatar poytaxti Doha shahrida bo‘lib o‘tayotgan dizayn biyennalesida Madaniyat va san’atni rivojlantirish jamg‘armasi bilan birgalikda Crafting Uzbekistan: Tradition in Threads ko‘rgazma loyihasini taqdim etmoqdamiz.

Ushbu tadbirda ham mahalliy, ham mintaqaviy, ham global miqyosda dizayn sohasiga oid ilg‘or tajribalar almashinuvi bo‘lib o‘tadi. Undagi ishtirokimizdan mamnunman», deb yozdi Saida Mirziyoyeva ijtimoiy tarmoqdagi sahifasida.

U «Hunarmand O‘zbekiston: tolalardagi an’ana» ko‘rgazmasida O‘zbekistonning boy hunarmandchilik an’analari bilan zamonaviy ijod uyg‘unligi namoyish etilayotganini ta’kidlagan.

«Ko‘p asrlik tarixga ega hunarmandchiligimizning bebaho merosi bizni an’ana va madaniyatimizni asrab-avaylashga undaydi», deydi Saida Mirziyoyeva.

U Qatar Muzeylar idorasi vakillariga global madaniy almashinuvni rivojlantirish va badiiy innovatsiyalar yaratish yo‘lidagi harakatlari, shuningdek, biyennalega taklif uchun minnatdorchilik bildirdi.