O‘zbekiston tashqi ishlar vaziri Yaponiya bosh vaziri bilan uchrashdi

O‘zbekiston tashqi ishlar vaziri boshchiligidagi mamlakat delegatsiyasi Yaponiya bosh vaziri tomonidan qabul qilindi.

Foto: TIV axborot xizmati

Tashrif bilan Tokioga borgan O‘zbekiston tashqi ishlar vaziri Baxtiyor Saidov Yaponiya bosh vaziri Fumio Kishida tomonidan qabul qilindi.

"Yaponiya bosh vaziri Fumio Kishida janobi oliylari tomonidan qabul qilinganimiz biz uchun sharafdir", – deb yozdi O‘zbekiston TIV rahbari o‘zining Telegram-kanalida.

Baxtiyor Saidov O‘zbekiston prezidenti Shavkat Mirziyoyevning salomini yetkazgan. Suhbat siyosiy muloqotdan tortib, madaniy almashinuvlargacha bo‘lgan keng ko‘lamli ikki tomonlama masalalarni qamrab oldi.

"Tashqi ishlar vazirliklari bundan keyin ham strategik hamkorligimizni yanada mustahkamlashda muhim o‘rin tutadi", deb yozadi u.