Toshkent viloyatida 2,2 mlrd so‘mlik elektrdan o‘g‘rincha foydalangan noqonuniy maynerlar aniqlandi

Xususan, Yangiyo‘l shahrida yashovchi I.N. 10 dona Antminer L3++ rusumli mayning qurilmalarini o‘zboshimchalik bilan umumiy foydalanishdagi elektr tarmog‘iga ulab, mayning faoliyati bilan shug‘ullanishi natijasida, davlat manfaatlariga 1 mlrd 19 mln 400 ming so‘m miqdorida zarar yetkazgan.

Qibray tumanida istiqomat qiluvchi R.J.ning xonadoni ko‘zdan kechirilganda, u hech qanday ruxsatnomasiz mayning faoliyati bilan shug‘ullanib, 685 mln 939 ming so‘mlik elektr energiyasini talon-toroj qilganligi aniqlandi va undan 2 ta to‘plamda bo‘lgan mayning qurilmalari ashyoviy dalil sifatida rasmiylashtirib olindi.

Qibray tumanida kuzatilgan yana bir holatda, M.S. o‘zining yashash manzilida kriptovaluta ishlab chiqarish faoliyati bilan qonunga xilof ravishda shug‘ullanib, 3 ta to‘plamda bo‘lgan mayning qurilmalaridan foydalanishi natijasida, elektr energiyasi bo‘yicha davlat manfaatlariga 579 mln 474 ming so‘m miqdorida zarar yetkazgan.

Hozirda mazkur shaxslarga nisbatan Jinoyat kodeksining 169-moddasi 4-qismi “a” bandi bilan jinoyat ishlari qo‘zg‘atilib, tergov harakatlari olib borilmoqda.