Mahalliy sayyohlarga keshbek sifatida 177 million so‘m qaytarildi.
Turizm qo‘mitasi Soliq qo‘mitasi bilan hamkorlikda yangi keshbek tizimini ishga tushirgan edi. 2022 yil 1 sentabrdan boshlab «O‘zbekiston bo‘ylab sayohat qil!» dasturi doirasida «Sayohat qil va keshbek ishla» shiori asosida respublika hududlari bo‘ylab ichki sayohatlarni amalga oshirgan mamlakat fuqarolariga xarajatlarining bir qismi qaytarib berilmoqda.
2023 yil davomida O‘zbekiston bo‘ylab sayohatga chiqqan mamlakat fuqarolariga sarflagan xarajatlari uchun jami 177 mln so‘mdan ortiq mablag‘ keshbek sifatida qaytarib berilgan.
Sayohat xarajatlarini qaytarish har bir turistga quyidagi miqdorlarda amalga oshiriladi:
● aviaqatnov orqali borib-kelish chiptasi narxining 15 foizi, lekin 150 ming so‘mdan oshmagan miqdorda;
● temiryo‘lda yoki avtobusda borib-kelish chiptasi narxining 15 foizi, lekin 80 ming so‘mdan oshmagan miqdorda;
● joylashtirish vositasida tunab qolish xarajatining 15 foizi, lekin 80 ming so‘mdan oshmagan miqdorda;
● teatr, muzey, sirk va badiiy galereyalarga har bir tashrif chiptasi narxining 50 foizi, lekin 20 ming so‘mdan oshmagan miqdorda.
Ma’lumot uchun, «Sayohat uchun keshbek» platformasi bilan ishlash uchun Soliq.uz mobil ilovasini yuklab olish, mobil ilova xizmatidan foydalanish uchun FaceID orqali shaxsni tizimda tasdiqlash kerak.
Sayohat yo‘nalishi va boshlanish sanasi tanlanadi. Keshbeklarni yig‘ish uchun fiskal cheklarni skanerlash orqali avia, temiryo‘l yoki avtobus biletlari ilovaga kiritiladi. Shuningdek, sayohatdan so‘ng «Sayohatni tugatish» tugmasi bosiladi va yig‘ilgan keshbek summalari shaxsiy mahalliy bank plastik kartasiga o‘tkaziladi.
