Urgutda mashinasidan qoradori topilgan haydovchiga jinoyat ishi qo‘zg‘atildi

YHXB xodimlari hujjatlarini tekshirish maqsadida “Kobalt” mashinasini to‘xtatishganda haydovchi o‘zini shubhali tutgan.

Foto: YHXB

Samarqand viloyati Urgut tumanida harakatlanib ketayotgan mashina YHXB xodimlari tomonidan to‘xtatilganda undan qoradori topilgan. Bu haqda viloyat IIB YHXB axborot xizmati xabar bermoqda.

Ma’lum qilinishicha, 2024 yil 13 aprel kuni soat 17:50 larda Urgut tumani Navoiy shohko‘chasida harakatlanib kelayotgan “Kobalt” Urgut tumani IIB JXX YHXB xodimlari tomonidan to‘xtatilgan.

Hujjatlarni ko‘zdan kechirish davomida haydovchi o‘zini shubhali tutgani sababli sohaviy xizmat xodimlari va xolislar ishtirokida mashinaning saloni ko‘zdan kechirilgan.

Shunda mashinada yelim paketga o‘ralgan to‘q jigar rangli, o‘tkir hidli yopishqoqsimon, taxminan og‘irligi 600 gramm bo‘lgan opiy giyohvandlik moddasi borligi aniqlangan.

Qayd etilishicha, holat yuzasidan Samarqand viloyati IIB tergov boshqarmasi tomonidan Jinoyat kodeksining tegishli moddalariga asosan jinoyat ishi qo‘zg‘atilib, hozirda dastlabki surishtiruv ishlari olib borilmoqda.