Suhrob Shodiyorov 8 yildan beri AQShda yashaydi. U Amerikaga kelganidan beri asosan haydovchilik qiladi. Nyu Yorkda yashovchi vatandoshimiz oyiga 10 ming AQSH dollari va undan koʻp daromad qiladi. Ammo u Amerikaga Oʻzbekistondagi rahbarlik lavozimi hamda tayyor karerasini tashlab kelgan. Suhbatdoshimizga koʻra, chiroyli hayot ortida hammaga ham koʻrinavermaydigan qiyinchiliklar ham bisyor.
Avvalo, oila va vatandan, ota-onadan uzoqda yashash koʻp yurtdoshlarimiz singari Suhrobni ham qiynaydi. Bundan tashqari, katta shaharda taksi haydash oson ish emas. Birinchidan, hujjatbozlik va haydovchilik guvohnomasini olish jarayonidan oʻtish lozim. Ikkinchidan, mijozlar – har xil odamlar.
Uzoq yillik haydovchi sifatida Suhrob mashinasiga biznesmenlardan tortib yuziga niqob taqib olganlar, narkotik moddalarni isteʼmol qilib olganlar ham chiqishini aytadi. Shuning uchun u bugun faqat biznes turdagi buyurtmalarni qabul qiladi.
Suhrobning qoʻshimcha qilishicha, serdaromad ish boʻlishiga qaramay oʻzbek taksistlarning eng katta muammosi – ingliz tilini hech boʻlmasa boshlangʻich darajada bilmasligi.
“Bizning taksistlar oddiy soʻzlarni ham bilmaydi. Masalan, ketayotganda mijoz savol bersa yoki nimanidir tushuntirsa, soʻrasa, jim oʻtirish juda gʻalati. Bir davlatga kelgandan keyin uning tilini ham biroz oʻrganib qoʻyaverish kerak”, deydi haydovchi Shodiyorov.
Shuningdek, suhbatdoshimiz Amerikada mijoz madaniyatiga ham toʻxtaldi. Aksariyat mijozlar hurmatni joyiga qoʻyishi, agar ular uchun sharoitlar yaratib qoʻyilsa, albatta, qadrlashini aytadi.
Masalan, Amerikada choychaqa madaniyati juda yaxshi shakllangan. Xizmat koʻrsatish nuqtalari va taksilarda mijozlar chin koʻngildan qoʻshimcha pul qoldirib ketadi. Yurtdoshimiz ham buni ijobiy baholadi.
“TIP madaniyati juda ham yaxshi bu yerda. Masalan, mening oʻzimga eng katta choychaqani bir odam $200 berib ketgandi. U bilan biz 100 kilometrdan oshiq yoʻl bosganmiz. Oʻzbekiston haqida gapirib berganman, hamsuhbat boʻlganman va oxirida qoʻshimcha 200 dollar berib ketgandi. Undan tashqari ham har kuni kamida 50-100 dollar choychaqa olamiz”, deydi Suhrob.
Lekin serdaromad soha va chiroyli hayotga ega boʻlishiga qaramay Suhrob Oʻzbekistonga butunlay qaytish harakatida. 8 yil dunyo moliya poytaxti – Nyu Yorkda yashaganiga qaramay, u baribir oʻz yurtini tanlagan. Buning sabablari qanday? Javob topish uchun suhbatni toʻliq tomosha qiling.
