“O‘g‘limni o‘ldiraman degani uchun 1,5 litr benzin to‘kdim va yoqdim". Erining qo‘l-oyog‘ini bog‘lab yoqib yuborgan ayol 12 yilga qamaldi

Samarqand shahrida 32 yoshli ayol mast holatda bo‘lgan turmush o‘rtog‘ining oyoq-qo‘llarini bog‘lab, ustiga benzin sepib, yoqib yuborgan. Bu haqda Oliy sud matbuot xizmati Aziz Obidov xabar berdi.

Jinoyatga qo‘l urgan ayol erkakning shar’iy nikoh asosida yashab kelayotgan xotini bo‘lgan va ular tez-tez janjallashib turishgan. “Zamon” informatsion dasturida berilgan lavhada keltirilishicha, sudlanuvchi ayol janjallarga eri oxirgi paytlarda uyga pul olib kelmagani va uni boshqa erkaklar bilan gaplashayotganlikda ayblab, rashk qilgani sabab bo‘lganini ma’lum qilgan.

Uning aytishicha, fojia sodir bo‘lgan kuni ham erkak ayolni urgan va o‘g‘lini o‘ldirish bilan qo‘rqitgan. Shundan so‘ng ayol ko‘chaga chiqib spirtli ichimlik olib kelib, turmush o‘rtog‘iga ichish uchun beradi va tanishiga benzin buyurtma qiladi.

Benzin kelgach, ayol uy ichida mast holda yotgan erining oyoq-qo‘llarini bog‘lab, uning ustiga benzin quyib yoqib yuboradi. Yonayotgan erkakka qo‘shnilar yordam ko‘rsatishgan. Biroq u shifoxonada vafot etgan.

“O‘g‘limni o‘ldiraman degani uchun bor-yo‘g‘i 1,5 litr benzin to‘kdim va yoqdim", degan ayblanuvchi sud majlisida.

Sudlanuvchi ayol avvalroq qarindoshini pichoqlagani uchun sudlangan va jazo muddatini o‘tab chiqqan bo‘lgan.

Jinoyat ishlari bo‘yicha Samarqand shahar sudida bo‘lib o‘tgan sud majlisida ayol Jinoyat kodeksining 97-moddasi (qasddan odam o‘ldirish) 2-qismi “v” (aybdorga ayon bo‘lgan ojiz ahvoldagi shaxsni o‘ldirish), “d” (boshqa shaxslarning hayoti uchun xavfli bo‘lgan usulda) va “j” (o‘ta shafqatsizlik bilan) bandlari bilan aybli deb topilib, 12 yil muddatga ozodlikdan mahrum etish jazosi tayinlangan.