Krasnodar o‘lkasiga dronlar hujum qildi

27 aprel, shanbaga o‘tar kechasi Rossiya havo hujumidan mudofaa tizimi Krasnodar o‘lkasi uzra uchuvchisiz uchoqlar hujumini qaytardi, deb xabar berdi viloyat gubernatori Veniamin Kondratev. Uning ma’lumotlariga ko‘ra, o‘lka turli hududlarida neftni qayta ishlash zavodlari va infratuzilma obektlarini nishonga olgan «o‘ndan ortiq uchuvchisiz uchoqlar tutib olingan». Qurbonlar va jiddiy vayronagarchiliklar yo‘q, favqulodda xizmatlar «UUA qulashi natijasida» yuzaga kelgan yong‘inlarni o‘chirishda davom etmoqda, dedi gubernator.

O‘z navbatida, Krasnodar o‘lkasining Slavyanskiy tumani rahbari Roman Sinyagovskiy Telegram’da Slavyansk-Kubandagi zavod uchuvchisiz uchoq hujumiga uchraganini ta’kidladi. «Rezervuar parki va distillash ustuniga jami 9 ta hujum uyushtirildi», deb yozdi u. Sinyagovskiyning so‘zlariga ko‘ra, qurbonlar yo‘q, ammo distillash ustuni shikastlangan.

Rossiya NQZga avvalgi dronlar hujumi 3 kun oldin sodir bo‘ldi

Rossiyaning qator viloyatlari rasmiylari 24 aprelga o‘tar kechasi Ukraina uchuvchisiz uchoqlarining hujumlari haqida ma’lum qildi. Smolensk viloyati gubernatori Vasiliy Anoxinning so‘zlariga ko‘ra, bir qator yonilg‘i-energetika obektlari hududida uchuvchisiz uchoqlar zarbalaridan keyin yong‘inlar boshlangan. 

Astra Telegram-kanali mahalliy aholiga tayanib Yarsevo tumanidagi Smolensk neftni qayta ishlash zavodi yonayotganini yozdi. Astra jamoasining qo‘shimcha qilishicha, hudud aholisi neftni qayta ishlash zavodi yaqinida to‘rtta yoki beshta portlash ovozini eshitgan. 

Uniannet Telegram-kanali xabariga ko‘ra, Lipetskda UUA harbiy texnika uchun shassilar ishlab chiqaradigan traktor zavodiga hujum qilgan.