Kiyev inson huquqlari to‘g‘risidagi konvensiyadan chetga chiqqanini rad etdi

Kiyev Ukraina inson huquqlari va asosiy erkinliklarini himoya qilish bo‘yicha Yevropa konvensiyasining bir qator qoidalarini to‘xtatib qo‘ygani haqidagi xabarlarni rad etdi. Ukraina Yevropa kengashiga mamlakatda 2022 yilda harbiy holat joriy etilganidan so‘ng darhol inson huquqlarining ayrim huquqlarini cheklash imkoniyati haqida ma’lum qilgan, dedi 29 aprel, dushanba kuni Ukraina adliya vaziri Denis Malyuska.

«Bu yangilik emas - urush olib borayotgan barcha davlatlar buni qiladi», deb yozdi u Facebook’da. Malyuskaning so‘zlariga ko‘ra, joriy yil aprel oyida Ukraina yana bir bor mavjud cheklovlar ro‘yxatiga aniqlik kiritib, uni qisqartirgan. «Ukraina aprel oyida himoyani to‘xtatmadi, aksincha - muayyan huquqlar to‘plamini cheklovchi bandni qayta ko‘rib chiqdi va olib tashladi», dedi vazir.

Ilgari qo‘llangan cheklovlarni qisman olib tashlash 

Oliy radaning inson huquqlari bo‘yicha vakili Dmitriy Lubinets ham gap yangi cheklovlar haqida emas, balki ilgari qo‘llanganlarning qisman bekor qilinishi haqida ketayotganiga ishontirdi. «Ya’ni, Ukraina bundan oldin ham cheklovlar kiritgan, ammo hozirgacha ular qo‘llanmagan!» – deya tushuntirdi u Telegram’da. 

Bir kun avval OAVda Ukraina Yevropa kengashiga mamlakatdagi harbiy holat tufayli inson huquqlari va erkinliklari to‘g‘risidagi Yevropa konvensiyasining ayrim bandlarini qisman to‘xtatib turish bo‘yicha ariza topshirgani haqida ma’lumot paydo bo‘ldi. Xususan, Kiyev urush tugagunga qadar uy-joy daxlsizligi, yozishmalar siri, shaxsiy va oilaviy hayotga aralashmaslik, harakatlanish erkinligi, fuqarolar erkinligi huquqi to‘g‘risidagi qoidalarga amal qilishni to‘xtatishi ko‘rsatilgan.