Namanganda qo‘shnisini o‘ldirish uchun qotil yollagan shaxs 10 yilga qamaldi

Namangan viloyatining To‘raqo‘rg‘on tumanida yashovchi Xurshid Muhiddinov o‘z qo‘shnisini o‘ldirish uchun qotil yollagan. Kun.uz mazkur jinoyat ishi doirasidagi sud hujjatlarini o‘rgandi. 

Sud hujjatlarida keltirilishicha, Xurshid Muhiddinov qo‘shnisi A.Boriyev va turmush o‘rtog‘i o‘rtasida ishqiy munosabat borligidan xabar topib, qo‘shnisini qasddan o‘ldirishni rejalashtirgan. U tanishi D.M. va D.P.ga murojaat qilib, A.Boriyevni o‘ldirib yuborish evaziga ming dollar berishini aytgan. D.M. va D.P. esa Namangan viloyati IIB boshlig‘i nomiga ariza bilan murojaat qilgan.

2023 yil 7 iyun kuni Namangan viloyati prokuraturasi tomonidan viloyat IIB JQB xodimlari hamkorligida o‘tkazilgan tezkor tadbirda A.Boriyev tegishli tartibda grimm qilinib, yuziga hayvon qoni surtilgan hamda qo‘l-oyoqlari bog‘langan holda Chortoq tumani Ayqiron mahallasi hududida joylashgan molxona binosiga olib borilgan. So‘ngra telefon orqali foto va videotasvirga olinib, buyurtmachiga yuborilgan.

Xurshid Muhiddinov D.M. boshqaruvidagi mashinada va’da qilingan pullardan 1,4 mln so‘mini unga bergan. Shundan so‘ng A.Boriyevni o‘ldirishda foydalanish uchun yo‘lda savdo do‘konidan pichoq va kanselyariya pichog‘i, dorixonadan esa tibbiy qo‘lqop va niqoblarni sotib olgan.

Aytilgan manzilga yetib kelgach ularni kutib turgan “killer” D.P. bilan ko‘rishib, tibbiy qo‘lqopni kiygan va A.Boriyev saqlab turilgan xonaga kirgan. Shu vaqtda Muhiddinov tezkor xodimlar tomonidan elektroshoker yordamida xavfsizlantirilib, to‘xtatib qolingan va qo‘lga olingan.

Xurshid Muhiddinov qo‘shnisi A.Boriyevni qasddan o‘ldirishga suiqasd qilganlikda aybli deb topilgan. Sud hukmi bilan unga 10 yil muddatga ozodlikdan mahrum qilish jazosi tayinlangan.

Avvalroq Navoiyda qaynakasini o‘ldirish uchun “killer” yollagan shaxs 15 yilga qamalgani xabar qilingandi.