YeI yetakchilari Gurjistonni «chet el agentlari» qonunini bekor qilishga chaqirmoqda

Yevropa Ittifoqi yetakchilari Gurjistonni Tbilisida parlament uchinchi o‘qishda ma’qullagan bahsli «chet el agentlari» qonunini bekor qilishga chaqirdi. 15 may, chorshanba kuni Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel va Yevropa komissari Oliver Varxei: «Ushbu qonunning qabul qilinishi Gurjistonning YeIga qo‘shilish yo‘lidagi taraqqiyotiga salbiy ta’sir ko‘rsatmoqda», deya bayonot berdi. 

Gurjistonning kelajakdagi yo‘li bo‘yicha qaror shu davlatning qo‘lida, deyiladi ular qo‘shma bayonotida. «Biz Gurjiston hukumatini qonunni bekor qilishga, YeIga a’zolik bo‘yicha o‘z majburiyatlarini saqlab qolishga va Gurjiston Yevropa integratsiyasi jarayonida amalga oshirishi uchun zarur bo‘lgan to‘qqiz bosqichda bayon qilingan zarur islohotlarni ilgari surishga chaqiramiz», - dedi Borrel va Varxei.

YeI raisi Belgiya YeIga qo‘shilishga intilayotgan Gurjiston xalqini qo‘llab-quvvatlaydi 

O‘z navbatida, Yevropa Ittifoqiga raislik qilayotgan Belgiya Gurjiston parlamenti tomonidan «chet el agentlari» to‘g‘risidagi qonun qabul qilinganidan afsusda ekanini bildirdi. Bu qonun Gurjistonni Yevropa qadriyatlaridan uzoqlashtiradi, deb yozadi qirollik tashqi ishlar vaziri Aja Lyabib X messenjerida. «Biz Gurjiston hukumatini bu choralarni qayta ko‘rib chiqishga va Yevropa Ittifoqi oldidagi majburiyatlarini bajarishga chaqiramiz», dedi u. 

Lyabibning so‘zlariga ko‘ra, Belgiya gurji xalqini va uning demokratiya, inson huquqlarini himoya qilish va qonun ustuvorligi yo‘lidagi tanlovini qo‘llab-quvvatlaydi. «Gurjistonliklar Yevropa kelajagiga intilmoqda. Ularning ovozi eshitilishi kerak», deb yozadi u. 

Gurjiston parlamenti «chet el agentlari» to‘g‘risidagi qonun loyihasini uchinchi o‘qishda ma’qulladi 

Bir kun avval Gurjiston parlamenti «chet el agentlari» haqidagi qonun loyihasini uchinchi o‘qishda qabul qildi. Yangi qoidaga ko‘ra, moliyasining 20 foizdan ko‘prog‘ini xorijdan oladigan nodavlat notijorat tashkilotlar va ommaviy axborot vositalari «chet el agent» sifatida ro‘yxatdan o‘tishlari shart. Rossiyaning xuddi shunday qonunidan ko‘chirilgan qonunga qarshi namoyishlar aprel oyida hukmron «Gurjiston orzusi» partiyasi uni parlamentga qayta kiritganidan so‘ng boshlangan. 

Newsgeorgia internet nashri Gurjiston ombudsmani Levan Ioselianiga tayanib yozganidek, bir oylik namoyishlar davomida 160 ga yaqin namoyishchi hibsga olingan, o‘nlab namoyishchilar politsiya tomonidan kaltaklangan, ammo «birorta ham politsiyachining javobgarligi masalasi ko‘tarilmagan». Shu bilan birga, Gurjiston Maxsus tergov xizmati Tbilisidagi namoyishlar chog‘ida hibsga olinganidan so‘ng ko‘plab jarohatlar bilan kasalxonaga yotqizilgan, «Bosqinchilikka qarshi harakat» yetakchisi David Katsaravaga nisbatan politsiya kuch ishlatgani bo‘yicha tergov boshlanganini e’lon qildi. Gurjiston matbuotiga ko‘ra, faolning burni va yuz suyaklari singan va operatsiya qilingan. 

2023 yil dekabridan Gurjiston Yevropa Ittifoqiga nomzod a’zo. Bu maqom Tbilisiga faqat Yevropa komissiyasi tomonidan tavsiya etilgan to‘qqizta qadam zaruriy bajarilishi sharti bilan berildi. Fuqarolik jamiyati va ommaviy axborot vositalari, inson huquqlari va erkinliklarini himoya qilish shular jumlasidandir. «Chet el agentlari» to‘g‘risidagi qonun loyihasi allaqachon Bryusselda bir necha bor tanqid qilingan. Yevroparlament yangi qonun Gurjistonning Yevropa Ittifoqiga yo‘lini yopadi degan rezolyutsiyani qabul qildi va Yevropa kengashi bu norma Yevropaning demokratiya va qonun ustuvorligi tamoyillariga mos kelmasligini e’lon qildi.