Yekaterina Dunsova Rossiyada «chet el agenti» deb tan olindi

31 may, juma kuni Rossiya Adliya vazirligi «chet el agentlari» reyestrini yangiladi. Unga jurnalist va siyosatchi Yekaterina Dunsova, huquq himoyachisi Marina Litvinovich, safarbar qilinganlar xotinlarining «Uyga yo‘l» harakati va uning yetakchilaridan biri Mariya Andreyeva kirdi. Bundan tashqari, Sota va Republic nashrlari, shuningdek, Sota fotografi Pavel Ivanov «chet el agentlari» ro‘yxatiga qo‘shildi.

Idora ularning reyestrga kiritilishini «Rossiya Federatsiyasi, shuningdek, Rossiya Federatsiyasi Qurolli kuchlari haqida salbiy imij yaratishga qaratilgan yolg‘on ma’lumotlarni tarqatganliklari» bilan asosladi. 

Dunsova: Bu mening saylovda qatnashmasligim uchun qilingan 

Yekaterina Dunsova «chet el agentlari» ro‘yxatga kiritilishi qaroriga rozi emasligini va unga e’tiroz bildirishini aytdi. «Bu mening shaxsan saylovlarda ishtirok etishimga va «Tong» partiyamizdan nomzodlarga yordam taqdim etishimga xalaqit berish uchun qilingan», — deb yozgan siyosatchi o‘zining Telegram-kanalida. U Adliya vazirligida ishtiroki ko‘rsatilgan internet-sahifalari va Telegram-kanallariga aloqasi yo‘qligini ta’kidladi.

Dunsova, shuningdek, Rossiya Federatsiyasi Adliya vazirligi rahbarining «chet el agenti» maqomiga qarshi chiqishga uringanlarning hech biri «Rossiya manfaatlariga xizmat qilishini» aytmagani haqidagi so‘zlarini esladi. «Shunday ekan, men Rossiya tarafdoriman va chet elning bizning ishlarimizga aralashuviga qarshi ekanligimni e’lon qilaman», dedi u. Dunsovaning so‘zlariga ko‘ra, uni reyestrga kiritish «Tong» partiyasi qurilishiga to‘sqinlik qilmaydi va uning a’zolariga hech qanday ta’sir ko‘rsatmaydi. 

«Chet el agentlari»siz bir yarim oy

Rossiya Federatsiyasi Adliya vazirligi «chet el agentlari» reyestrini bir yarim oy davomida yangilamadi, ro‘yxat oxirgi marta 12 aprelda yangilangan. O‘shanda unga jurnalistlar Ilya Barabanov, Asya Kazanseva va Ivan Filippov, huquq himoyachisi Ivan Astashin va siyosatchi Nikolay Kuzmin kiritildi.