Alkogol va tamaki bozorini tartibga solish inspeksiyasi tashkil etiladi

O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti qoshida Alkogol va tamaki bozorini tartibga solish inspeksiyasi tashkil etilmoqda. 3 iyun bu haqda prezident qarori qabul qilindi.

Qarorga ko‘ra, inspeksiyani boshlig‘ini bosh prokuror lavozimga tayinlaydi va lavozimdan ozod qiladi. Inspeksiya boshlig‘i maqomi, mehnatga haq to‘lash shartlari, tibbiy va transport xizmati ko‘rsatish sharoitlari bo‘yicha departament boshlig‘i o‘rinbosariga tenglashtiriladi.

Inspeksiya o‘zining yuridik shaxs tashkil etmagan holda budjetdan tashqari jamg‘armasiga ega bo‘ladi.

2025 yil 1 yanvargacha quyidagi axborot tizimlari (hisobga olish axborot tizimi) joriy etiladi:

iste’mol va texnik etil spirti, alkogol va tamaki mahsulotlarini ishlab chiqarish va ularning aylanmasi hajmini hisobga olish axborot tizimi;
iste’mol va texnik etil spirti, alkogol va tamaki mahsulotlarini ishlab chiqarishni va ularning aylanmasini nazorat qilish bo‘yicha xavfni tahlil qilish tizimi;
iste’mol va texnik etil spirti tashuvchi avtotransport vositalari harakatini markazlashtirilgan tarzda monitoring va nazorat qilish imkoniyatiga ega geoaxborot tizimi.

Bunda, 2025 yil 1 yanvargacha hisobga olish axborot tizimlari o‘zaro axborot almashinuvini yo‘lga qo‘yish uchun Soliq qo‘mitasi, Bojxona qo‘mitasi, Kadastr agentligi, Respublika tovar-xomashyo birjasi, “Asl belgisi” mahsulotlarni markirovkalash va kuzatib borish milliy axborot tizimi hamda boshqa manfaatdor idoralarning axborot tizimlari bilan integratsiya qilinadi.

Eslatib o‘tamiz, muqaddam bu yo‘nalishda O‘zbekiston Respublikasi Alkogol va tamaki bozorini tartibga solish hamda vinochilikni rivojlantirish agentligi faoliyat yuritgan, agentlik ma’muriy o‘zgarishlar mobaynida 2023 yil 1 yanvardan boshlab tugatilgan edi.