Buxoro shahrining sobiq hokimi viloyat Ekologiya boshqarmasiga boshliq bo‘ldi

Jamol Nosirov Buxoro viloyati ekologiya, atrof muhitni muhofaza qilish va iqlim o‘zgarishi boshqarmasi boshlig‘i etib tayinlandi. Bu haqda viloyat hokimligi axborot xizmati xabar berdi. 

Jamol Nosirov 1985 yil 12 iyunda Buxoro shahrida tug‘ilgan. 2005 yilda Buxoro davlat universitetini jismoniy madaniyat va jismoniy tarbiya o‘qituvchisi, psixolog mutaxassisligi bo‘yicha tamomlagan.

U faoliyati davomida «Kamolot» YoIH Buxoro viloyati kengashi raisi, Oliy Majlis Qonunchilik palatasi deputati, Buxoro viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari (2017−2020), madaniyat vazirining birinchi o‘rinbosari lavozimlarida ishlagan.

2021 yilda Buxoro shahri hokimi etib tayinlangan Jamol Nosirov 2024 yilning may oyi boshida sog‘lig‘i yomonlashgani sababli lavozimidan ozod etilgandi.