«Hizbulloh»ning qo‘shni Livandan Isroilga qarshi hujumlari fonida Isroil bosh vaziri Binyamin Netanyahu jangchilarga yangi javob zarbalari bilan tahdid qildi. «Oxirgi kunlarda biz «Hizbulloh»ga ular tasavvur ham qila olmagan bir qancha zarbalarni berdik. Agar «Hizbulloh» harakati bu xabarni tushunmagan bo‘lsa, men va’da beramanki, keyingilarini aniq tushunadi», — deya 22 sentabr, yakshanba kuni Isroil bosh vazirining so‘zlaridan iqtibos keltirgan AFP agentligi.
Shu bilan birga, Netanyahu o‘z bayonotida yana bir bor o‘zi boshchiligidagi vazirlar mahkamasi «Hizbulloh»ning Isroil shimoliga hujumlarini to‘xtatishga harakat qilishini, bu hududlarni tark etishga majbur bo‘lgan odamlar o‘z uylariga qaytishini ta’kidladi. «Hech bir davlat o‘z fuqarolariga hujumlarga, shaharlariga qilingan hujumlarga toqat qila olmaydi, biz - Isroil davlati ham ularga toqat qilmaymiz», dedi u.
Isroil Livan hududiga zarbalar berdi
22 sentabr kuni ertalab Isroil mudofaa armiyasi raketalar otilganidan so‘ng Livandagi «Hizbulloh» harakati obektlariga zarba berganini ma’lum qildi.
TsAHAL ma’lumotlariga ko‘ra, 22 sentabr kuni ertalab Livandan Isroil shimolidagi Hayfa hududiga 85 ta raketa uchirilgan. Ularning aksariyati Isroil havo mudofaasi tomonidan urib tushirilgan, biroq ba’zi raketalar o‘z nishonlariga yetib borgan. Umuman olganda, «Hizbulloh» jangchilari Isroil shimoliga 115 ta raketa uchirdi.
Isroil qutqaruv xizmatlarining xabar berishicha, Livandan o‘qqa tutilishi natijasida Hayfa hududida kamida uch kishi yaralangan. Bundan tashqari, bir qancha binolar va avtomobillarga zarar yetgan.
Avvalroq, 20 sentabr kuni Isroil Bayrutga havo hujumi uyushtirdi. Livan Sog‘liqni saqlash vazirligi ma’lumotlariga ko‘ra, 22 sentabr holati bo‘yicha kamida 45 kishi halok bo‘lgan. Shu bilan birga, «Hizbulloh»ning yuqori martabali qo‘mondoni Ibrohim Oqil va «Radvan» maxsus kuchlarining Hamas jangchilarini qo‘llab-quvvatlashga qaratilgan harbiy operatsiyalari qo‘mondoni Ahmad Mahmud Vahbiy halok bo‘ldi. «Hizbulloh» Oqil va Vahbiyning o‘limini tasdiqladi. Ayni paytda, AP agentligining yozishicha, zarba qurbonlari orasida ayollar va bolalar ham bor.
Livanda «Hizbulloh» peyjyer va ratsiyalarining portlashi
Ikki kun davomida butun Livan bo‘ylab «Hizbulloh» jangchilari foydalanadigan peyjyerlar, ratsiyalar va radiostansiyalarning katta portlashlari sodir bo‘ldi. Umuman olganda, mamlakat Sog‘liqni saqlash vazirligi ma’lumotlariga ko‘ra, gadjetlar portlashlari oqibatida kamida 26 kishi halok bo‘lgan, 3500 dan ortiq kishi jarohatlangan.
